साक्षीदार | ३१ ऑक्टोबर २०२३ | जळगाव जिल्ह्यात गेल्या काही दिवसापासून दिवसा व रात्री अपघाताची मालिका सुरु असतांना नुकतेच भडगाव तालुक्यातील पिंपळगाव गिरणा थडी गावातील भजनी मंडळाच्या कारला जामनेर तालुक्यातील शेरी लोंद्री रस्त्यावरील वळण रस्त्यावर रविवारी रात्री साडेनऊच्या सुमारास अपघात झाला. यात दिलीप रमेश पाटील हे जागीच ठार झाले तर अन्य दोन जण जखमी असून, एक गंभीर असल्याचे पोलिसांनी सांगितले.
मिळालेल्या माहितीनुसार, भडगाव तालुक्यातील पिंपळगाव गिरणा थडी येथील भजनी मंडळ कारने (एमएच १९, सीवाय ४५०८) भजनासाठी कासली (ता. जामनेर) येथे लोंद्री मार्गाने जात असताना शेरी-लोंद्री रस्त्यावरील योगेश पाटील यांच्या शेताजवळील वळण रस्त्यावर चालकाचे कारवरील नियंत्रण सुटले व कार झाडावर आदळली. कारमध्ये एकूण पाच जण बसलेले होते. यातील दिलीप रमेश पाटील जागीच ठार झाले तर हेमंत सुभाष पाटील (३२) हे गंभीर जखमी असून, सतीश साहेबराव पाटील हे किरकोळ जखमी झाले आहेत. अन्य दोन जण बचावले आहेत. शेरी ग्रामस्थांबरोबरच घटनास्थळी पोलिस कर्मचारी रवींद्र देशमुख, भरत लिंगायत, हेमंत सोनवणे यांनी तातडीने येत मदतकार्य केले. रुग्णवाहिका वेळेवर न पोहोचल्याने जखमींना तातडीने पहूर ग्रामीण रुग्णालयात पोलिस वाहनातून दाखल केले. ग्रामीण रुग्णालयात जखमींवर प्राथमिक उपचार करून जळगावला हलविण्यात आले. सोमवारी मृत दिलीप पाटील यांचे शवविच्छेदन करून मतदेह नातेवाईकांच्या ताब्यात दिला. या घटनेने समस्त पिंपळगाव गिरणा थडी परिसरावर शोककळा पसरली आहे.
