Ajit Pawar Cm साक्षीदार न्युज | रत्नागिरी, ४ मे २०२५ | उपमुख्यमंत्री अजित पवार यांनी पुन्हा एकदा मुख्यमंत्रीपदाची इच्छा व्यक्त केल्यानंतर महाराष्ट्राच्या राजकारणात नव्या चर्चांना उधाण आलं आहे. मुंबईतील एका कार्यक्रमात पवार म्हणाले, “माझीही बऱ्याच वर्षांपासून मुख्यमंत्री होण्याची इच्छा आहे, पण त्यासाठी योग जुळून यावा लागतो.” यावर माजी खासदार आणि शिवसेना (उद्धव बाळासाहेब ठाकरे) नेते विनायक राऊत यांनी थेट महाविकास आघाडीमध्ये (मविआ) परतण्याची ऑफर देत पवारांचं स्वप्न पूर्ण होऊ शकतं, असं म्हटलं आहे.
रत्नागिरी येथे माध्यमांशी बोलताना राऊत यांनी सत्ताधारी महायुतीवर जोरदार टीका केली. “अजित पवारांनी मविआत परत यावं, त्यांचं मुख्यमंत्री होण्याचं स्वप्न पूर्ण होईल,” असं राऊत म्हणाले. त्यांनी उपमुख्यमंत्री एकनाथ शिंदे यांच्यावरही निशाणा साधला. “शिंदे आणि भाजपमधील दरी वाढत आहे. शिंदे नैराश्यात गेले आहेत,” असा खोचक टोला राऊतांनी लगावला.
महायुतीवर राऊतांचा हल्लाबोल
राऊत यांनी महायुती सरकारच्या धोरणांवरही प्रश्नचिन्ह उपस्थित केलं. “सध्या युद्धसदृश्य परिस्थिती निर्माण करून पंतप्रधान नरेंद्र मोदींचे फोटो प्रसारमाध्यमांवर झळकवले जात आहेत. हे पक्षाच्या प्रसिद्धीसाठी ठरवून केलं जात आहे का, असा प्रश्न सामान्य जनतेला पडतोय,” असं ते म्हणाले. तसंच, लाडकी बहीण योजनेचा उल्लेख करत त्यांनी राज्याच्या आर्थिक स्थितीवर चिंता व्यक्त केली. “निवडणुकीच्या तोंडावर लाडकी बहीण योजनेसाठी दीड हजार रुपये देण्याचं आश्वासन देण्यात आलं. पण आता राज्याच्या तिजोरीत खडखडाट आहे. अनेक लोकोपयोगी आणि मागासवर्गीय योजनांना काटछाट लागली आहे. आता दीड हजार रुपये देणंही सरकारला कठीण जाईल,” असा टोमणा राऊतांनी मारला.
शेतकऱ्यांचा विरोध आणि महामार्गाचा मुद्दा
राऊत यांनी शक्तिपीठ महामार्ग आणि इतर महामार्ग प्रकल्पांवरही टीका केली. “शक्तिपीठ महामार्ग सुपीक शेतजमिनीतून जाणार आहे. याला प्रत्येक जिल्ह्यातील शेतकऱ्यांनी कडाडून विरोध केला आहे. मुंबई-गोवा महामार्ग गेल्या १५ वर्षांत पूर्ण झालेला नाही. कोस्टल महामार्गासाठी उद्धव ठाकरे यांनी मुख्यमंत्री असताना १० हजार कोटींची तरतूद केली होती, तरीही तो पूर्ण झालेला नाही. रत्नागिरी-नागपूर महामार्गाचंही तसंच आहे. या महामार्गांच्या नावाखाली शेतकऱ्यांच्या जमिनी लुबाडण्याचं काम सुरू आहे,” असा गंभीर आरोप राऊतांनी केला. त्यांनी भाजपवर ठेकेदारांना अफाट निधी देऊन पक्षाचा निधी वाढवण्याचा धंदा करत असल्याचा खळबळजनक दावा केला.
ठाकरे बंधूंच्या एकत्र येण्याची चर्चा
राऊत यांनी उद्धव ठाकरे आणि राज ठाकरे यांच्या संभाव्य एकत्र येण्याच्या चर्चांवरही भाष्य केलं. “महाराष्ट्रातील जनतेची इच्छा आहे की उद्धव ठाकरे आणि राज ठाकरे यांनी एकत्र यावं. सध्याची खुनशी आणि लुबाडणारी राजवट उलटून टाकण्यासाठी ही गरज आहे,” असं ते म्हणाले. तसंच, काश्मीरमधील पहलगाम हल्ल्याच्या वेळी उद्धव ठाकरेंच्या तिथल्या भेटीला “योगायोग” असं संबोधलं.
राजकीय समीकरणं आणि भविष्यातील शक्यता
अजित पवार यांनी यापूर्वीही अनेकदा मुख्यमंत्रीपदाची इच्छा व्यक्त केली आहे. मविआच्या या ऑफरमुळे राजकीय वर्तुळात चर्चांना उधाण आलं आहे. शिंदे आणि भाजपमधील वाढत्या तणावाच्या पार्श्वभूमीवर पवारांचं पुढचं पाऊल काय असेल, याकडे सर्वांचं लक्ष लागलं आहे. तसंच, शेतकऱ्यांचा महामार्गांना होणारा विरोध आणि राज्याच्या आर्थिक अडचणी हे मुद्देही आगामी काळात राजकीय समीकरणांवर परिणाम करू शकतात.
जळगावात हॉटेल कमल पॅराडाइजजवळ ३० वर्षीय तरुणाची निर्घृण हत्या
