Ashok Kharat रावेर–यावल | मिलिंद जंजाळे | राज्यभर भोंदू बाबांविरोधात सुरू असलेल्या कारवाईच्या पार्श्वभूमीवर भोंदू बाबा अशोक खरात याचे रावेर आणि यावल तालुक्याशी काही संबंध असल्याची चर्चा सध्या वेग घेत आहे. या चर्चेमुळे स्थानिक पातळीवर उत्सुकता आणि तर्क-वितर्कांना उधाण आले आहे.
विशेष म्हणजे, ही चर्चा केवळ सर्वसामान्य नागरिकांमध्येच नव्हे, तर काही प्रशासकीय वर्तुळातही दबक्या आवाजात सुरू असल्याचे समोर येत आहे. त्यामुळे या प्रकरणाकडे अधिक गांभीर्याने पाहिले जात आहे.
अनौपचारिक माहितीनुसार, अशोक खरात याने अंधश्रद्धेचा आधार घेत विविध ठिकाणी प्रभाव निर्माण केल्याचे बोलले जात आहे. धार्मिक कार्यक्रम, पूजापाठ तसेच तथाकथित “चमत्कार” यांच्या माध्यमातून लोकांचा विश्वास संपादन केल्याच्या चर्चाही रंगू लागल्या आहेत.
याच पार्श्वभूमीवर रावेर–यावल तालुक्यात त्याचे काही संपर्क जाळे होते का, याबाबत प्रश्न उपस्थित होत आहेत. काही नागरिकांनी नाव न सांगण्याच्या अटीवर सांगितले की, स्थानिक स्तरावर काही व्यक्तींमार्फत या प्रकरणाचे संबंध राजकीय, व्यावसायिक तसेच काही अधिकाऱ्यांपर्यंत पोहोचले असावेत, अशी शक्यता व्यक्त केली जात आहे. मात्र, यासंदर्भात अद्याप कोणतीही अधिकृत पुष्टी झालेली नाही.
दरम्यान, अंधश्रद्धा निर्मूलन कार्यकर्त्यांनी या प्रकरणाची सखोल चौकशी करण्याची मागणी केली आहे. “जर अशा प्रकारचे संबंध असतील, तर ते उघडकीस आणून दोषींवर कारवाई होणे आवश्यक आहे,” अशी भूमिका त्यांनी मांडली आहे.
पोलीस प्रशासनानेही या चर्चेकडे लक्ष ठेवले असून, ठोस पुरावे समोर आल्यास आवश्यक ती कारवाई करण्यात येईल, असे संकेत दिले आहेत. नागरिकांनी अफवांवर विश्वास न ठेवता संशयास्पद बाबींबाबत पोलिसांना माहिती देण्याचे आवाहन करण्यात आले आहे.
एकूणच, भोंदूगिरीविरोधातील कारवाईच्या पार्श्वभूमीवर रावेर–यावल तालुक्यात सुरू असलेल्या या चर्चेमुळे वातावरण तापले असून, यामागील सत्य काय आहे, याकडे सर्वांचे लक्ष लागले आहे.
