Bhadgaon News भडगाव | साक्षीदार न्यूज | शहरातील प्रभाग क्रमांक ८ मधील बाळद रस्ता काँक्रिटीकरण झाल्यानंतर वाहनांच्या वेगात मोठी वाढ झाली होती. या रस्त्यावर दुचाकी व चारचाकी वाहने भरधाव वेगाने धावत असल्याने शाळेत जाणारी लहान मुले, तसेच पायी चालणारे अबालवृद्ध नागरिक यांना गंभीर धोका निर्माण झाला होता.
या पार्श्वभूमीवर परिसरातील नागरिकांकडून वारंवार गतिरोधक बसवण्याची मागणी करण्यात येत होती. ही मागणी नगरसेवक लखीचंद पाटील व नगरसेविका सौ. समीक्षा लखीचंद पाटील यांच्याकडे करण्यात आली होती.
नागरिकांच्या सुरक्षेचा प्रश्न लक्षात घेत नगराध्यक्षा सौ. रेखा प्रदीप मालचे, शिवसेनेचे गटनेते तथा नगरसेवक लखीचंद प्रकाश पाटील आणि नगरसेविका समीक्षा लखीचंद पाटील यांनी तत्काळ दखल घेतली. त्यांच्या पुढाकारातून प्रभाग क्रमांक ८ मधील बाळद रस्त्यावर गतिरोधक बसवण्याच्या कामाला सुरुवात करण्यात आली आहे.
या उपक्रमामुळे परिसरातील अपघातांना आळा बसण्यास मदत होणार असून नागरिकांमध्ये समाधान व्यक्त केले जात आहे.
“जनतेची सुरक्षा हीच आमची प्राथमिकता आहे,” असे मत गटनेते लखीचंद पाटील यांनी दैनिक साक्षीदार न्यूजशी बोलताना व्यक्त केले.
