Road Safety भडगाव | गोरख माळी | येथील बाळद रोडवर सातत्याने वाढणारी वाहतूक आणि सुसाट धावणारी वाहने नागरिकांसाठी धोक्याची ठरत आहेत. बाळद रोडचे काँक्रिटीकरण झाल्यानंतर या रस्त्यावर वाहनांचा वेग लक्षणीय वाढला असून हा मार्ग कायमच वर्दळीचा असतो.
या परिसरात कॉलेज आणि विविध क्लासेस असल्यामुळे दररोज मोठ्या संख्येने विद्यार्थी व विद्यार्थिनी ये-जा करतात. मात्र या रस्त्यावर एकही गतिरोधक नसल्याने वाहनचालक बेदरकारपणे वेगात वाहने चालवताना दिसून येतात. परिणामी अपघातांचे प्रमाण वाढले आहे.
गेल्या आठवड्यात याच बाळद रोडवर एका दिवसात तब्बल तीन अपघात घडल्याची घटना समोर आली आहे. या पार्श्वभूमीवर परिसरातील नागरिकांनी बाळद रोडवर तातडीने गतिरोधक बसवण्याची मागणी जोर धरू लागली आहे.
याबाबत अधिक माहिती देताना संजय सोनार यांनी सांगितले की, या विषयासंदर्भात लवकरच नगर परिषदेला निवेदन देण्यात येणार आहे. नागरिकांच्या सुरक्षिततेचा विचार करून बाळद रोडवर शक्य तितक्या लवकर गतिरोधक बसवण्यात यावेत, अशी मागणी त्यांनी केली आहे.
