Girna River भडगाव | गोरख माळी | भडगाव तालुक्यात अवैध वाळू वाहतुकीविरोधात महसूल प्रशासनाने कारवाईचा बडगा उगारला आहे. भडगाव शहराजवळील घोडदे परिसरातील गिरणा नदी पात्रातून अवैधरित्या वाळू वाहतूक करणारे एक ट्रॅक्टर महसूल विभागाने ताब्यात घेतले आहे. यासोबतच एक डंपरही जप्त करण्यात आला असून संबंधितांवर दंडात्मक कारवाई करण्यात येणार असल्याची माहिती देण्यात आली आहे.
भडगावच्या तहसीलदार शितल सोलाट यांच्या मार्गदर्शनाखाली ही कारवाई करण्यात आली. महसूल पथकाने घोडदे परिसरात तपासणी दरम्यान अवैध गौणखनिज वाहतूक करणारे ट्रॅक्टर पकडून ते थेट तहसील कार्यालयात जमा केले.
महसूल पथकाची संयुक्त कारवाई
या कारवाईत नायब तहसीलदार सुधीर सोनवणे यांच्यासह ग्राम महसूल अधिकारी अविनाश जंजाळे, प्रविण पवार, संजय सोनवणे, गितेश महाजन, योगेश पाटील, लोकेश महाजन तसेच ग्राम महसूल सेवक नितीन मोरे, समाधान माळी, लहू कोळी आदी अधिकारी व कर्मचाऱ्यांचा समावेश होता.
महसूल विभागाकडून अवैध गौणखनिज उत्खनन व वाहतुकीविरोधात पुढील काळातही कठोर कारवाई सुरूच राहणार असल्याचा इशारा प्रशासनाने दिला आहे.
