Bhusawal Honda Showroom| मिलिंद जंजाळे | भुसावळ येथील जुना जळगाव रोडवरील होंडा अधिकृत शोरूमविरोधात ग्राहक फसवणुकीचा आरोप समोर आला आहे. नव्याने खरेदी केलेल्या गाडीमध्ये तांत्रिक बिघाड झाल्याचा दावा करत रिपब्लिकन सेनेकडून शोरूम व्यवस्थापनाला निवेदन देण्यात आले असून ७ दिवसांत समाधानकारक तोडगा न काढल्यास तीव्र आंदोलनाचा इशारा देण्यात आला आहे.
रिपब्लिकन सेनेचे कार्यकर्ते श्री. सुमित अशोक निकम यांनी ८ फेब्रुवारी २०२६ रोजी सदर शोरूममधून नवीन ‘होंडा ॲक्टिव्हा’ खरेदी केली होती. तक्रारीनुसार, अवघ्या आठ दिवसांतच गाडीच्या इंजिनमध्ये बिघाड निर्माण झाला. याबाबत शोरूममध्ये तक्रार नोंदवली असता, मेकॅनिकल मॅनेजर विकास शिंदे यांनी दुरुस्तीसाठी १५ दिवसांचा कालावधी मागितल्याचे सांगितले जात आहे.
दरम्यान, गाडी भररस्त्यात बंद पडल्याने अपघाताचा धोका निर्माण झाल्याचा आरोपही करण्यात आला आहे. या पार्श्वभूमीवर आज शोरूम व्यवस्थापकांना निवेदन देण्यात आले.
निवेदनात पुढील मुद्दे मांडण्यात आले आहेत:
-
उत्पादनात दोष असताना गाडी बदलून न देणे कायद्याविरुद्ध असल्याचा दावा
-
ग्राहक फसवणुकीबाबत कलम ४२० अंतर्गत गुन्हा दाखल करण्याचा इशारा
-
सदोष वाहने विक्रीबाबत आरटीओकडे ट्रेड सर्टिफिकेट रद्द करण्यासाठी पाठपुरावा
रिपब्लिकन सेनेकडून स्पष्ट करण्यात आले की, ७ दिवसांत श्री. सुमित निकम यांना नवीन गाडी व लेखी माफीनामा न दिल्यास शोरूमसमोर तीव्र आंदोलन छेडण्यात येईल.
या प्रसंगी जिल्हाध्यक्ष विनोद सोनवणे, जिल्हा नेते दिनेश इखारे, सामाजिक कार्यकर्ते बंटी नरवाडे, जिल्हाध्यक्षा सौ. वंदनाताई सोनवणे, सौ. वंदनाताई आराक, श्री. देवदत्त मकासरे (मेजर) व इतर पदाधिकारी उपस्थित होते.
