साक्षीदार | ११ ऑक्टोबर २०२३ | मराठा आरक्षणासाठी मनोज पाटील यांचा राज्यभर दौरा सुरु असतांना आता धनगर समाजाला एसटी आरक्षण मिळावे या मागणीसाठी आमदार गोपीचंद पडळकर यांनी धनगर जागर यात्रेचे आयोजन केले आहे.
धनगर समाज बांधवांनी या यात्रेत सहभागी होण्याचे आवाहन त्यांनी केले आहे. या यात्रेची सुरुवात १२ ऑक्टोबरपासून होईल. पडळकर यांच्या धनगर जागर यात्रेला मराठवाड्यातील येलडा येथून सुरुवात होईल. येलडा, कळंब, जालना आणि छत्रपती संभाजीनगर या जिल्ह्यात सभा होतील. १२ ते १७ ऑक्टोबर या कालावधीत २० ते २२ सभा होणार आहेत. विदर्भ, मराठवाडा, खान्देश, प. महाराष्ट्र आणि कोकणात या सभा होतील.
याबाबत गोपीचंद पडळकर यांनी म्हटले की, सरकारकडून आश्वासन मिळाले आहे. पण अंमलबजावणीची आवश्यकता आहे. लोकांच्या भावना तीव्र आहेत. त्यामुळे आश्वासनावर थांबून जमणार नाही. सरकारची भूमिका सकारात्मक आहे. पडळकर म्हणाले, २२ तारखेला कवठे महंकाळ येथील बिरोबावाडीत दसरा मेळावा होणार आहे. या मेळाव्याला मोठ्या संख्येने लोक येतील. गोपीचंद पडळकर म्हणाले, सरकारमध्ये असलो तर माझ्यासाठी आरक्षणाची चळवळ महत्त्वाची आहे. सरकारमधील माझी कामे मी करत आहे. पण, आरक्षणाच्या लढ्यासाठी लोकांमध्ये राहणे ही माझी जबाबदारी आणि कर्तव्य आहे. म्हणून, आरक्षण मिळत नाही, तोपर्यंत यात्रा सुरूच राहिल. महिना दोन महिन्यात याबाबत सरकारने तोडगा काढवा, अशी अपेक्षा आहे.
