धरणगाव ; – तालुक्यातील चमगाव येथे मुलीला पळवून नेल्याच्या संशयावरून मुलाच्या मामाला त्याच्या घरात घुसून पाच जणांनी बेदम मारहाण केली तर जीवेठार मारण्याची धमकीही दिली. ही घटना शुक्रवारी घडली आहे. याप्रकरणी धरणगाव पोलीस ठाण्यात पाच जणांविरोधात गुन्हा दाखल करण्यात आला आहे.
पोलीस सुत्रांनी दिलेली माहिती अशी की, धरणगाव तालुक्यातील चमगाव चैत्राम यशवंत पाटील वय-४४ हे आपल्या परिवारासह वास्तव्याला आहे. चैत्राम यांच्या भाच्याने एका मुलीला पळवून नेल्याच्या संशयावरून गावात राहणाऱ्या पाच जणांनी त्यांना घरात घुसून शिवीगाळ करत लाठ्याकाठ्यांनी बेदम मारहाण करत गंभीर दुखापत केली. ही घटना शुक्रवारी ५ जानेवारी रोजी दुपारी १ वाजता गावात घडली. याप्रकरणी सायंकाळी ५ वाजता चैत्राम पाटील यांनी धरणगाव पोलीस ठाण्यात धाव घेवून तक्रार दिली आहे. त्यांनी दिलेल्या तक्रारीवरून धरणगाव पोलीस ठाण्यात मारहाण करणारे पाच जणांविरोधात गुन्हा दाखल करण्यात आला आहे.
