Devi Visarjan | एरंडोल । साक्षीदार न्यूज । तालुक्यातील खेडी कढोली येथे देवीच्या विसर्जन मिरवणुकीदरम्यान धक्काबुक्कीच्या क्षुल्लक कारणावरून आणि जुन्या वादातून दोन गटांमध्ये तुफान हाणामारी झाल्याची धक्कादायक घटना घडली आहे. सोमवारी, ६ ऑक्टोबर रोजी सायंकाळी ७ वाजेच्या सुमारास घडलेल्या या घटनेत दोन्ही गटांतील एकूण १३ जण जखमी झाले असून, त्यापैकी दोघांची प्रकृती चिंताजनक आहे. या घटनेमुळे संपूर्ण गावात तणावाचे वातावरण पसरले आहे.
एरंडोल पंचायत समितीचे माजी सभापती मोहन सोनवणे यांनी दिलेल्या माहितीनुसार, खेडी कढोली गावात देवीच्या विसर्जन मिरवणुकीत धक्काबुक्की लागल्याच्या कारणावरून वादाला सुरुवात झाली. या वादाचे पर्यवसान काही वेळातच तुफान हाणामारीत झाले, ज्यात दोन्ही गटांनी एकमेकांना लाठ्या-काठ्यांनी मारहाण केली. यामागे जुना वाद असल्याचेही म्हटले जात आहे.
रुग्णालयातही पुन्हा तणाव
या हाणामारीत जखमी झालेल्या सर्वांना तातडीने जळगाव येथील शासकीय वैद्यकीय महाविद्यालयात उपचारासाठी दाखल करण्यात आले. मात्र, रुग्णालयातही दोन्ही गट पुन्हा एकदा आमनेसामने आले, ज्यामुळे परिसरात काही काळ तणावाचे वातावरण निर्माण झाले होते. परिस्थिती नियंत्रणाबाहेर जात असल्याचे पाहून तातडीने जिल्हापेठ पोलिसांना पाचारण करण्यात आले. पोलिसांनी वेळीच हस्तक्षेप करून परिस्थिती नियंत्रणात आणली आणि त्यानंतर जखमींवर उपचार सुरू करण्यात आले.
याप्रकरणी अद्याप पोलिसांत कोणतीही तक्रार दाखल करण्यात आलेली नाही, अशी माहिती सूत्रांनी दिली आहे. मात्र, या घटनेमुळे खेडी कढोली गावात भीती आणि दहशतीचे वातावरण पसरले असून, पोलीस परिस्थितीवर लक्ष ठेवून आहेत.
दोन्ही गटातील एकूण १३ जण जखमी
प्रकाश सिताराम सोनवणे वय २७, सोनान नारायण सोनवणे वय २०, संदीप सिताराम सोनवणे वय ३०, ऋषिकेश विठ्ठल सोनवणे वय ३०, संतोष ऋषिदास सोनवणे वय २०, पुरुषोत्तम मोहन सोनवणे वय ३०, किरण युवराज सोनवणे वय ४०, नितीन अरुण सोनवणे वय २८, अरुण लहू सोनवणे वय ४९, मंगलाबाई सुरेश सोनवणे वय ५७, युवराज लहू सोनवणे वय ६०, दुर्गेश एकनाथ सोनवणे वय ३२, राहुल मोहन सोनवणे वय ३५ हे गंभीर जखमी झाले आहेत.
