Jalgaon Crime साक्षीदार न्यूज | |सुनिल भोळे | जळगावातील रामेश्वर कॉलनी परिसरातून चोरीस गेलेली स्विफ्ट डिझायर कार एमआयडीसी पोलिसांनी केवळ तीन दिवसांत शोधून काढत आरोपीला अटक केली आहे. पोलिसांनी छत्रपती संभाजीनगर येथून चोरी गेलेले वाहन जप्त केले असून सुमारे ४.५ लाख रुपये किमतीची ही कार परत मिळाल्याने फिर्यादींनी सुटकेचा निश्वास सोडला आहे.
फिर्यादी यांनी १९ नोव्हेंबर रोजी रात्री ८ वाजता त्यांच्या घरासमोर कार पार्क केली होती. मात्र, पुढील दिवशी सकाळी कार बेपत्ता असल्याचे लक्षात आल्यानंतर त्यांनी परिसरात शोध घेतला. वाहनाचा काहीच मागोवा न लागल्याने अज्ञात व्यक्तीने चोरी केल्याची खात्री पटली. यानंतर एमआयडीसी पोलिस ठाण्यात गुन्हा क्रमांक ८५७/२०२५ भादंवि कलम ३०३(२) अंतर्गत गुन्हा नोंदविण्यात आला.
प्रकरणाची गंभीर दखल घेत पोलिसांनी गुप्त माहिती तसेच परिसरातील सीसीटीव्ही फुटेजचे बारकाईने विश्लेषण केले. तपासात आरोपीची हालचाल स्पष्ट झाल्यानंतर नवनाथ नगर परिसरात सापळा रचून २३ नोव्हेंबर रोजी विनय मनोहर जाधव (रा. नवनाथ नगर, जळगाव) याला अटक करण्यात आली. चौकशीत त्याने कार छत्रपती संभाजीनगर येथे नेल्याची कबुली दिली.
आरोपीच्या माहितीच्या आधारे पोलिसांनी तत्काळ छत्रपती संभाजीनगर येथे धाड टाकत अंदाजे ४,५०,000 रुपये किमतीची स्विफ्ट डिझायर कार जप्त केली. वाहन सुरक्षित स्थितीत सापडले असून पुढील तपास सुरू आहे.
ही कामगिरी एमआयडीसी पोलिस स्टेशनचे पोलीस निरीक्षक बबन आव्हाड यांच्या मार्गदर्शनाखाली गुन्हे शोध पथकाने पार पाडली. पथकात पोउनि राहुल तायडे, पोउनि चंद्रकांत धनके, सफौ विजयसिंग पाटील, पोह. प्रदीप चौधरी, पोह. रमेश चौधरी, पोह. प्रमोद लाडवंजारी, पोह. किरण चौधरी, पोह. गिरीश पाटील, पोकॉ विशाल कोळी, पोकॉ नितीन ठाकूर, पोकॉ किरण पाटील, पोकॉ शशिकांत मराठे, पोकॉ नरेंद्र मोरे आदींचा समावेश होता.
संपूर्ण कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलिस अधिकारी नितीन गणापुरे व पोनि बबन आव्हाड यांच्या मार्गदर्शनाखाली करण्यात आली.
