Modi Government |साक्षीदार न्यूज | पंतप्रधान नरेंद्र मोदी यांनी १५ ऑगस्ट २०२५ रोजी लाल किल्ल्यावरून जाहीर केलेल्या पंतप्रधान विकसित भारत रोजगार योजनेंतर्गत तरुणांना त्यांच्या पहिल्या नोकरीवर १५,००० रुपये देण्याची योजना आता प्रत्यक्षात येत आहे. या योजनेच्या अंमलबजावणीसाठी खास पोर्टल लॉन्च करण्यात आले असून, तरुण आणि नियोक्ते यांनी यावर नोंदणी करावी, असे आवाहन केंद्रीय मंत्री मनसुख मांडविया यांनी केले आहे. ही योजना सुमारे १ लाख कोटी रुपयांच्या गुंतवणुकीसह दोन वर्षांत ३.५ कोटी नवीन रोजगार निर्मितीचा दावा करते.
योजनेचे वैशिष्ट्य
या योजनेत १ जुलै २०२५ ते ३१ जुलै २०२७ या कालावधीत पहिली नोकरी मिळवणाऱ्या तरुणांना १५,००० रुपये आर्थिक सहाय्य देण्यात येईल. ही रक्कम दोन हप्त्यांमध्ये थेट लाभ हस्तांतरण (DBT) पद्धतीने आधार ब्रिज पेमेंट सिस्टमद्वारे दिली जाईल. दुसरीकडे, नोकरी देणाऱ्या कंपन्यांना प्रत्येक नवीन कर्मचाऱ्यासाठी दरमहा कमाल ३,००० रुपये प्रोत्साहन रक्कम त्यांच्या पॅन-लिंक्ड खात्यात जमा केली जाईल, ज्यामुळे रोजगार निर्मितीला चालना मिळेल.
रजिस्ट्रेशनची प्रक्रिया
या योजनेचा लाभ घेण्यासाठी तरुणांनी पंतप्रधान विकसित भारत रोजगार योजना पोर्टल (https://pmvbry.epfindia.gov.in किंवा https://pmvbry.labour.gov.in) वर नोंदणी करावी. पहिल्यांदा नोकरी करणाऱ्या तरुणांना उमंग अॅपवर फेस ऑथेंटिकेशन टेक्नॉलॉजी (FAT) वापरून युनिव्हर्सल अकाउंट नंबर (UAN) तयार करावा लागेल. नियोक्ते आणि कर्मचारी यांनी आपली माहिती पोर्टलवर किंवा उमंग अॅपद्वारे अपडेट करावी, असे आवाहन करण्यात आले आहे. या प्रक्रियेत सहभागी होण्यासाठी आधार आणि मोबाईल नंबर लिंक असणे आवश्यक आहे.
खासगी क्षेत्राला बळकट करण्यासाठी
ही योजना तरुणांमध्ये रोजगाराच्या संधी वाढवण्यासाठी आणि खासगी क्षेत्राला बळकट करण्यासाठी डिझाइन करण्यात आली आहे. केंद्रीय मंत्र्यांनी सांगितले की, ही योजना देशातील युवकांसाठी क्रांतीकारी पाऊल ठरेल आणि अर्थव्यवस्थेला गती देईल. दरम्यान, पोर्टलवर नोंदणीची प्रक्रिया सोपी आणि पारदर्शक असून, सर्वांनी त्याचा लाभ घ्यावा, असे आवाहन करण्यात आले आहे.
