Eknath Khadse Bhosari Land मुंबई | साक्षीदार न्यूज | राष्ट्रवादी काँग्रेसचे नेते एकनाथ खडसे यांना भोसरी जमीन व्यवहार प्रकरणात मोठा कायदेशीर दणका बसला आहे. मुंबई सत्र न्यायालयातील विशेष एमपीएमएलए न्यायालयाने खडसे यांच्या पत्नी मंदाकिनी खडसे यांच्याविरोधात मंगळवारी अजामीनपात्र वॉरंट जारी केले आहे. या प्रकरणात खडसे यांनाही मोठा झटका बसल्याचे मानले जात आहे.
भोसरी येथील कथित जमीन घोटाळा प्रकरणात शुक्रवारी आरोप निश्चिती होणार होती. मात्र एकनाथ खडसे आणि मंदाकिनी खडसे हे दोघेही न्यायालयात गैरहजर राहिल्याने विशेष न्यायालयाने नॉन-बेलेबल वॉरंट काढण्याचा आदेश दिला. त्यामुळे या प्रकरणातील अडचणी खडसे कुटुंबीयांसाठी वाढल्या आहेत.
एकनाथ खडसे हे महसूलमंत्री असताना भोसरी औद्योगिक वसाहतीतील एक भूखंड नियमांचे उल्लंघन करून त्यांची पत्नी मंदाकिनी खडसे आणि जावई गिरीश चौधरी यांनी खरेदी केल्याचा आरोप आहे. हा भूखंड मूळ बाजारभावापेक्षा अत्यंत कमी किमतीत खरेदी केल्याचे या प्रकरणातील मुख्य आरोप आहेत. या व्यवहारामुळे राज्यभरात मोठी राजकीय खळबळ उडाली होती आणि त्यानंतर खडसे यांना मंत्रिपदाचा राजीनामा द्यावा लागला होता.
या प्रकरणात 2016 मध्ये गुन्हा दाखल झाला असून तेव्हापासून सुनावणी सुरू आहे. 3 डिसेंबर 2025 रोजी मुंबई सत्र न्यायालयातील विशेष न्यायालयाने या जमीन विक्रीशी संबंधित आर्थिक गैरव्यवहार प्रकरणात एकनाथ खडसे आणि त्यांच्या कुटुंबीयांना दोषमुक्त करण्यास स्पष्ट नकार दिला होता. त्यानंतर आरोप निश्चितीची प्रक्रिया सुरू झाली.
दरम्यान, या प्रकरणातील सत्र न्यायालयात सुरू असलेल्या कारवाईला अंतरिम स्थगिती देण्यास मुंबई उच्च न्यायालयानेही नकार दिला होता. त्यामुळे आरोप निश्चितीचा मार्ग मोकळा झाला असून या प्रकरणाची पुढील सुनावणी १३ फेब्रुवारी रोजी होणार आहे.
