Eknath Shinde Black Magic | साक्षीदार न्यूज | जिल्हा परिषद निवडणूक मतदानाच्या पूर्वसंध्येला सोलापूर जिल्ह्यात एक धक्कादायक प्रकार उघडकीस आला असून त्यामुळे राजकीय वर्तुळात खळबळ उडाली आहे. शिंदेसेना उमेदवाराच्या घराबाहेर कथित काला जादू केल्याचा प्रकार समोर आला असून विजय–पराभवासाठी अंधश्रद्धेचा आधार घेतला जात असल्याची गंभीर बाब समोर आली आहे.
ग्रामीण भागातील मिनी मंत्रालय म्हणून ओळखल्या जाणाऱ्या जिल्हा परिषदांच्या निवडणुकीमुळे सध्या राजकीय वातावरण चांगलेच तापले आहे. सोलापूर जिल्ह्यात काही ठिकाणी निवडणुकीत यश मिळवण्यासाठी कोणत्याही थराला जाण्याचे प्रकार घडत असल्याचे दिसून येत आहे.
मोहोळ तालुक्यातील पेनूर गटाचे उमेदवार व शिंदेसेनेचे जिल्हा प्रमुख चरणराज चवरे यांच्या घराबाहेर हा प्रकार घडल्याची माहिती समोर आली आहे. त्यांच्या प्रचार पत्रकावर हळदी-कुंकू टाकून, लिंबावर सुई व टाचण्या लावण्यात आल्याचे आढळून आले आहे. विशेष म्हणजे या प्रचार साहित्यामध्ये उपमुख्यमंत्री एकनाथ शिंदे यांचा फोटोही असून त्यावर हळदी-कुंकू लावल्याचे दिसून आले आहे.
या घटनेची माहिती पसरताच परिसरात हा प्रकार पाहण्यासाठी नागरिकांची मोठी गर्दी झाली होती. राज्यातील १२ जिल्हा परिषदा आणि त्याअंतर्गत येणाऱ्या १२५ पंचायत समित्यांसाठी शनिवारी, ७ फेब्रुवारी रोजी मतदान होणार आहे. मतदानाच्या अवघ्या काही तास आधी हा प्रकार समोर आल्याने निवडणूक प्रक्रियेवर चर्चेला उधाण आले आहे.
महाराष्ट्रात नरबळी, अघोरी प्रथा आणि जादूटोणा यांना प्रतिबंध घालण्यासाठी २०१३ मध्ये कायदा करण्यात आला आहे. मात्र तरीही दुर्गम भागांबरोबरच निमशहरी आणि पुरोगामी महाराष्ट्रातही अंधश्रद्धेचे प्रकार घडताना दिसत आहेत. निवडणुकीतील विजय वा पराभव हा काला जादूने नव्हे, तर सूज्ञ मतदारांच्या निर्णयाने आणि त्यांच्या मताने ठरतो, हे लक्षात घेणे आवश्यक असल्याचे मत नागरिकांमधून व्यक्त होत आहे.
