IPS Om Prakash साक्षीदार न्युज । कर्नाटकातील माजी पोलीस महासंचालक आणि 1981 बॅचचे आयपीएस अधिकारी ओम प्रकाश यांचा संशयास्पद मृत्यू झाल्याने खळबळ उडाली आहे. रविवारी दुपारी त्यांचा मृतदेह बेंगळुरूतील एचएसआर लेआउट परिसरातील त्यांच्या निवासस्थानी रक्ताच्या थारोळ्यात आढळला. या घटनेने स्थानिक पोलिसांमध्ये चिंता व्यक्त होत असून, तपासाला वेग आला आहे.
प्राथमिक माहितीनुसार, घटनास्थळी ओम प्रकाश यांच्या पत्नी आणि मुलगी उपस्थित होत्या. त्यांच्या शरीरावर जखमा दिसल्याने हत्येचा संशय निर्माण झाला आहे. पोलिसांनी त्यांच्या पत्नीला चौकशीसाठी ताब्यात घेतले असून, तीच मुख्य संशयित असण्याची शक्यता वर्तवली जात आहे. ओम प्रकाश यांच्या पत्नीने पोलिसांना फोन करून मृत्यूची माहिती दिली, त्यानंतर तातडीने पोलिसांनी घटनास्थळ गाठले.
बेंगळुरु शहर पोलिसांनी सांगितले की, ओम प्रकाश हे निवृत्तीनंतर बेंगळुरूत राहत होते. त्यांचा मृतदेह घरात पडलेल्या अवस्थेत सापडला असून, प्राथमिक तपासात घरगुती वाद हे कारण असण्याची शक्यता आहे. पोलिसांनी मृतदेह पोस्टमार्टमसाठी रुग्णालयात पाठवला असून, घटनेच्या मागील नेमक्या कारणाचा शोध सुरू आहे. सध्या पोलिस तपासातून अधिक माहिती समोर येण्याची प्रतीक्षा आहे.
