Gold Rate Today साक्षीदार न्युज | मुंबई, १२ मे २०२५ | गेल्या 48 तासांत सोन्याच्या भावात तब्बल 8,000 रुपयांची घसरण नोंदवली गेली आहे. भारत-पाकिस्तान युद्ध थांबल्यानंतर आणि आंतरराष्ट्रीय बाजारपेठेतील बदलांमुळे सोन्याच्या किमतींमध्ये मोठे चढ-उतार दिसून येत आहेत. इंडियन बुलियन ज्वेलर असोसिएशनच्या ताज्या आकडेवारीनुसार, १२ मे रोजी मुंबई आणि पुण्यातील सराफा बाजारात 24 कॅरेट सोन्याचा प्रति 10 ग्रॅम भाव 92,910 रुपये, तर 22 कॅरेट सोन्याचा भाव 85,287 रुपये नोंदवला गेला.
रविवारी (११ मे) 96,710 रुपये असणारा सोन्याचा भाव सोमवारी आणखी 4,000 रुपयांनी घसरला. यापूर्वी, भारत-पाकिस्तान तणावामुळे आणि भारतीय लष्कराच्या ऑपरेशन सिंदूरमुळे सोन्याच्या किमती गेल्या आठवड्यात 1,00,500 रुपयांपर्यंत पोहोचल्या होत्या. मात्र, तणाव निवळण्याच्या परिस्थितीमुळे आणि आंतरराष्ट्रीय बाजारातील घडामोडींमुळे भावात घसरण झाली आहे.
आंतरराष्ट्रीय बाजारात अमेरिका-चीन यांच्यातील आयात शुल्कासंदर्भातील निर्णयाचा मोठा परिणाम सोन्याच्या किमतींवर झाला आहे. अमेरिकेने चीनमधील वस्तूंवरील आयात शुल्क 145% वरून 30% पर्यंत, तर चीनने अमेरिकन वस्तूंवरील शुल्क 125% वरून 10% पर्यंत 90 दिवसांसाठी कमी केले आहे. या निर्णयामुळे जागतिक शेअर बाजारात सुधारणा दिसून आली, ज्याचा थेट परिणाम सोन्याच्या किमतींवर झाला. याशिवाय, बँक ऑफ इंग्लंडच्या चलनविषयक धोरणांमुळेही मौल्यवान धातूंच्या किमतींवर परिणाम झाल्याचे तज्ज्ञांचे मत आहे.
गेल्या आठवड्यात सोन्याच्या किमतींनी लाखाची पातळी गाठल्याने ग्राहकांमध्ये खरेदीविषयी साशंकता दिसून आली होती. मात्र, सलग दोन दिवसांच्या घसरणीनंतर अनेक ग्राहक पुन्हा सोने खरेदीचा विचार करत आहेत. तथापि, काही जण भावातील चढ-उतार पाहता ‘वेट अँड वॉच’च्या भूमिकेत आहेत. तज्ज्ञांच्या मते, पुढील काही दिवसांत आंतरराष्ट्रीय बाजारातील घडामोडी आणि देशांतर्गत मागणी यावर सोन्याच्या किमती अवलंबून राहतील.
