साक्षीदार | ७ नोव्हेबर २०२३ | राज्यात गेल्या काही महिन्यापासून अपघाताची मालिका सुरु असून आता आणखी एका अपघाताची धक्कादायक बातमी समोर आली असून हा अपघात कर्जत-नेरळ मार्गावर झाला आहे. कर्जत किरवली ब्रिज वरून इनोव्हा कार रेल्वे ट्रॅकवर थेट खाली कोसळली. त्याचवेळी समोरून येणाऱ्या मालगाडीची कारला धडक बसली. ही धडक एवढी भीषण होती की कारमधील तिघांचा जागीच मृत्यू झाला. तर दोघे जण गंभीर जखमी झाले आहेत.मंगळवारी पहाटे चारच्या सुमारास हा अपघात झाला आहे. या दुर्दैवी घटनेत जखमी झालेल्या दोघांवर सध्या एम जी एम रुग्णालयात उपचार सुरू असल्याची माहिती मिळाली आहे.
घटनास्थळावरून मिळालेल्या माहितीनुसार, अपघातग्रस्त कार ही कर्जत येथून नेरळच्या दिशेने जात होती. त्यावेळी कारमध्ये पाच ते सहा प्रवासी होते. मात्र ही कार कर्जत ते नेरळच्या दरम्यान असलेल्या किरवली पुलावर आल्यावर कारचालकाचे कारवरील नियंत्रण अचानक सुटले. आणि ही कार क्षणार्धात धाडकन ब्रिजवरून खाली असलेल्या पनवेल कर्जत रेल्वे मार्गावर कोसळली. मात्र त्याच वेळी तेथून एक मालगाडी जात होती. त्या मालगाडीची कारला जोरात धडक बसली आणि भीषण अपघात झाला. या अपघातात तिघांचा मृत्यू झाला झाला, कारचेही मोठे नुकसान झाले. या अपघाताची माहिती मिळताच स्थानिक पोलीस आणि आजूबाजूच्या लोकांनी तातडीने मदतीसाठी धाव घेतली. अपघातातील दोन जखमींना तातडीने उपचारांसाठी एमजीएम रुग्णालयात दाखल करण्यात आले. मात्र या भीषण अपघातामुळे एकच खळबळ उडाली आहे.
