Aapla Davakhana Scam फैजपूर | विकी वानखेडे |जळगाव जिल्ह्यातील हिंदुरुदयसम्राट बाळासाहेब ठाकरे आपला दवाखाना आणि वर्धनी केंद्र शहरी आरोग्य योजनेत कथित कोट्यवधी रुपयांच्या भ्रष्टाचाराच्या विरोधात भीम आर्मी भारत एकता मिशनने फैजपूर येथील प्रांताधिकारी कार्यालयात निवेदन सादर केले. या निवेदनात जिल्हा आरोग्य अधिकारी डॉ. सचिन भायेकर यांच्यावर तात्काळ निलंबनाची कारवाई करून विशेष तपास पथकामार्फत (SIT) चौकशी करण्याची मागणी करण्यात आली आहे.
निवेदनात म्हटले आहे की, १५व्या वित्त आयोगातून प्राप्त निधीचा वापर जनतेच्या आरोग्यसेवेसाठी न होता गैरव्यवहारासाठी झाला आहे. यामागे डॉ. भायेकर यांची भूमिका संशयास्पद असल्याचा आरोप भीम आर्मीने केला आहे. यापूर्वी १५ जुलै रोजी आयोजित पत्रकार परिषदेत या घोटाळ्याचा तपशील उघड करण्यात आला होता, परंतु अद्याप कोणतीही कारवाई झालेली नाही, असेही निवेदनात नमूद आहे.
भीम आर्मीने प्रशासनाला १४ ऑगस्टपर्यंत कारवाई करण्याची मुदत दिली आहे. तसे न झाल्यास १५ ऑगस्ट रोजी जळगाव जिल्हाधिकारी कार्यालयासमोर बेमुदत आंदोलन करण्याचा इशारा देण्यात आला आहे. आंदोलनादरम्यान कोणताही अनुचित प्रकार घडल्यास त्याची जबाबदारी प्रशासनावर राहील, असेही त्यांनी स्पष्ट केले.
या प्रसंगी भीम आर्मीचे रावेर तालुका अध्यक्ष राहुल निंभोरे, जिल्हा प्रसिद्धीप्रमुख राहुल जयकर, तालुका उपाध्यक्ष जुम्मा तडवी, जिल्हा संघटक हेमराज तायडे, संतोष तायडे, अविनाश लहासे, मुकद्दर तडवी, मोसिम तडवी यांच्यासह अनेक कार्यकर्ते उपस्थित होते.
