Jalgaon Airport Bomb | साक्षीदार न्यूज | राज्यात वेगाने विकसित होत असलेल्या जळगाव विमानतळाचे महत्त्व दिवसेंदिवस वाढत असून, मुंबई, पुणे, अहमदाबाद, हैदराबाद आणि गोवा यांसारख्या प्रमुख शहरांसाठी येथून नियमित विमानसेवा सुरू आहेत. अशा या अत्यंत महत्त्वाच्या विमानतळावर बॉम्ब ठेवल्याची धमकी मिळाल्याने एकच खळबळ उडाली आणि सुरक्षा यंत्रणांची तात्काळ धावपळ सुरू झाली.
अचानक आलेल्या या धमकीमुळे क्षणभर विमानतळ परिसरात तणावाचे वातावरण निर्माण झाले. स्थानिक पोलिसांसह बॉम्ब शोध व नाशक पथकाने (BDDS) तातडीने विमानतळावर दाखल होत अत्याधुनिक उपकरणांच्या सहाय्याने संपूर्ण परिसराची सखोल तपासणी सुरू केली. परिस्थितीची गंभीरता लक्षात घेता श्वान पथकही घटनास्थळी दाखल झाले.
या कारवाईदरम्यान पोलीस अधीक्षक डॉ. महेश्वर रेड्डी, अपर जिल्हाधिकारी, उपविभागीय पोलीस अधिकारी, मुख्य वैद्यकीय अधिकारी, औद्योगिक वसाहत पोलीस ठाण्याचे निरीक्षक तसेच भारतीय विमानतळ प्राधिकरणाचे अधिकारी आणि कर्मचारी सर्व कामे बाजूला ठेवून तातडीने विमानतळावर उपस्थित राहिले. संभाव्य धोक्याच्या पार्श्वभूमीवर सर्व यंत्रणा पूर्णतः सज्ज अवस्थेत दिसून आल्या.
प्रत्यक्ष बॉम्ब नव्हे, तर सुरक्षा मॉक ड्रिल
काही वेळानंतर या संपूर्ण प्रकारामागील वास्तव स्पष्ट झाल्यानंतर सर्वांनी सुटकेचा निःश्वास सोडला. विमानतळावर प्रत्यक्ष बॉम्ब नसून, *संवेदनशील ठिकाणी आपत्कालीन परिस्थिती हाताळण्याच्या तयारीसाठी आयोजित करण्यात आलेला हा व्यापक मॉक ड्रिल* असल्याचे स्पष्ट झाले.
या सरावाचा मुख्य उद्देश म्हणजे, बॉम्बसारख्या गंभीर धमकीच्या प्रसंगी प्रशासन, पोलीस आणि अन्य सुरक्षा यंत्रणांचा प्रतिसाद किती तत्पर, समन्वयपूर्ण आणि प्रभावी आहे, याची प्रत्यक्ष चाचणी घेणे हा होता. धमकी मिळाल्यानंतर अवलंबली जाणारी संपूर्ण कार्यपद्धती टप्प्याटप्प्याने राबवण्यात आली.
परिसर सील, प्रवाशांचे सुरक्षित स्थलांतर
मॉक ड्रिलदरम्यान विमानतळाचा परिसर तात्काळ सील करण्यात आला. संशयास्पद हालचालींवर बारकाईने लक्ष ठेवण्यात आले. प्रवासी, विमानतळ कर्मचारी आणि उपस्थित नागरिकांना कोणताही गोंधळ न होता सुरक्षित ठिकाणी हलवण्यात आले. बीडीडीएस पथकाने संपूर्ण परिसराची तपासणी करून संशयास्पद वस्तू आढळल्यास त्या निष्क्रिय करण्याची प्रक्रिया प्रत्यक्ष दाखवली.
याचवेळी आपत्कालीन परिस्थितीत वैद्यकीय मदत तत्काळ उपलब्ध होऊ शकते का, यासाठी आरोग्य यंत्रणांची सज्जताही तपासण्यात आली. रुग्णवाहिका, वैद्यकीय पथके आणि आवश्यक उपकरणे तत्काळ कार्यान्वित ठेवण्यात आली होती.
यंत्रणांमधील समन्वयाची कसून परीक्षा
या सरावादरम्यान विविध यंत्रणांमधील समन्वय, माहितीची देवाणघेवाण आणि निर्णय प्रक्रिया यांची सखोल चाचणी घेण्यात आली. कोणतीही गडबड न होता सर्व यंत्रणांनी नियोजनबद्ध, शिस्तबद्ध आणि वेळेचे काटेकोर पालन करत आपली जबाबदारी पार पाडली.
वाहतूक नियंत्रण, सुरक्षा बंदोबस्त आणि आपत्कालीन सेवांचा प्रतिसाद समाधानकारक असल्याचे निरीक्षण प्रशासनाने नोंदवले. प्रवाशांची सुरक्षितता सर्वोच्च मानून विमानतळावरील सुरक्षा व्यवस्था अधिक सक्षम आणि आधुनिक करण्यासाठी अशा प्रकारचे मॉक ड्रिल अत्यंत उपयुक्त ठरत असल्याचे अधिकाऱ्यांनी स्पष्ट केले.
