Jalgaon Crime News जळगाव | साक्षीदार न्यूज | शहरात गुन्हेगारीने पुन्हा एकदा डोके वर काढले असून, किरकोळ वादातून एका तरुणाचा जीव गेल्याची धक्कादायक घटना समोर आली आहे. जैनाबाद परिसरात रविवारी अवघ्या ५०० रुपयांच्या मागणीवरून झालेल्या वादात एका तरुणावर धारदार शस्त्राने हल्ला करण्यात आला होता. या हल्ल्यात गंभीर जखमी झालेल्या तरुणाचा सोमवारी सकाळी उपचारादरम्यान मृत्यू झाला. या घटनेमुळे जळगाव शहर पुन्हा एकदा हादरले असून परिसरात भीतीचे वातावरण पसरले आहे.
नेमकी घटना काय? नितीन नाना काळे (वय ३५, रा. जैनाबाद, जळगाव) असे मृत तरुणाचे नाव आहे. नितीन हा आपल्या कुटुंबासह जळगावात वास्तव्यास होता. काही महिन्यांपूर्वीच त्याला गोवा येथे कटलरीच्या दुकानात नोकरी मिळाली होती, जिथे तो कुटुंबाचा उदरनिर्वाह करण्यासाठी काम करत होता. चार दिवसांपूर्वीच तो सुट्टीनिमित्त जळगावात आपल्या घरी आला होता.
रविवारी, २२ मार्च रोजी दुपारी ३ वाजेच्या सुमारास नितीन जैनाबाद परिसरातून जात असताना, संशयित आरोपी शाम तुकाराम सूर्यवंशी याने त्याला अडवून ५०० रुपयांची मागणी केली. नितीनने पैसे देण्यास नकार दिला, ज्याचा राग अनावर झाल्याने संशयित आरोपी शाम याने नितीनवर धारदार शस्त्राने सपासप वार केले.
उपचारादरम्यान मृत्यू रक्ताच्या थारोळ्यात पडलेल्या नितीनला तातडीने शासकीय वैद्यकीय महाविद्यालय व रुग्णालयात दाखल करण्यात आले होते. मात्र, त्याची प्रकृती चिंताजनक होती. अखेर सोमवारी, २३ मार्च रोजी सकाळी ६ वाजेच्या सुमारास उपचारादरम्यान त्याची प्राणज्योत मालवली. नितीनच्या मृत्यूची बातमी समजताच कुटुंबीयांनी रुग्णालयात एकच आक्रोश केला. त्याच्या पश्चात आई-वडील, पत्नी, एक मुलगा आणि भाऊ-बहीण असा परिवार आहे.
याप्रकरणी शनिपेठ पोलीस ठाण्यात खुनाचा गुन्हा दाखल करण्याची प्रक्रिया सुरू असून, किरकोळ कारणावरून झालेल्या या हत्येमुळे शहरात संताप व्यक्त केला जात आहे.
