Jalgaon Midc Police साक्षीदार न्युज | ५ मे २०२५ |जळगाव शहरातील कुरांबा शिवार परिसरात एमआयडीसी पोलिसांनी गोपनीय माहितीच्या आधारे कारवाई करत एका व्यक्तीला देशी बनावटीचा कट्टा (अग्निशस्त्र) बाळगल्याप्रकरणी अटक केली आहे. ही कारवाई १ मे २०२५ रोजी साई सिटी परिसरात करण्यात आली. पोलिसांनी संशयिताकडून एक देशी कट्टा जप्त केला असून, पुढील तपास सुरू आहे.
पोलिसांना मिळालेल्या गुप्त माहितीनुसार, चेतन वसंता देऊळकार हा कुरांबा शिवारातील साई सिटी परिसरात बेकायदेशीर शस्त्र घेऊन फिरत असल्याची माहिती मिळाली होती. या माहितीच्या आधारे एमआयडीसी पोलीस ठाण्याचे पोलीस निरीक्षक संदीप पाटील यांच्या मार्गदर्शनाखाली एक विशेष पथक तयार करण्यात आले. या पथकात पोलीस उपनिरीक्षक राहुल तायडे , पोलीस कॉन्स्टेबल चंद्रकांत धनके, गणेश ठाकरे, नितीन ठाकूर आणि विशाल कोळी यांचा समावेश होता.
पथकाने मिळालेल्या माहितीची पडताळणी करून सापळा रचला आणि संशयिताला ताब्यात घेतले. संशयिताकडे सखोल चौकशी आणि झडतीदरम्यान एक २०००० रुपये किमतीचा देशी बनावटीचा कट्टा आढळून आला. पोलिसांनी हा कट्टा जप्त केला असून, संशयिताविरुद्ध आर्म्स अॅक्ट आणि संबंधित कायद्यांतर्गत गुन्हा दाखल करण्यात आला आहे.
पोलीस निरीक्षक संदीप पाटील यांनी सांगितले की, “ही कारवाई शहरातील बेकायदेशीर शस्त्रास्त्रांच्या वापरावर नियंत्रण ठेवण्याच्या दृष्टीने महत्त्वाची आहे. संशयिताची कसून चौकशी सुरू असून, त्याच्याकडून आणखी माहिती मिळण्याची शक्यता आहे.” तसेच, या प्रकरणात शस्त्राचा स्रोत आणि संशयिताचे इतर गुन्ह्यांशी संबंध असल्याचा तपास पोलिसांकडून केला जात आहे.
जळगाव शहरात अशा प्रकारच्या कारवायांमुळे नागरिकांमध्ये सुरक्षिततेची भावना वाढत आहे. एमआयडीसी पोलिसांचे या तत्पर कारवाईबद्दल कौतुक होत आहे. पोलिसांनी नागरिकांना आवाहन केले आहे की, कोणत्याही संशयास्पद हालचालींची माहिती तात्काळ पोलिसांना कळवावी.
संपर्क: एमआयडीसी पोलीस ठाणे, जळगाव
फोन: ०२५७-२२१०५००
