Modular Operation Theatre | जळगाव | सुनिल भोळे | जिल्ह्यातील ग्रामीण रुग्णालयांमध्ये सुरू असलेल्या मॉड्युलर ऑपरेशन थिएटर आणि मॉड्युलर लेबर रूमच्या कामांबाबत तक्रारी समोर आल्याने प्रशासनाने गंभीर दखल घेतली आहे. यासंदर्भात Maharashtra Government अंतर्गत जिल्हा नियोजन समिती, जळगाव कार्यालयाकडून जिल्हा शल्य चिकित्सक यांना पत्र पाठवून सविस्तर अहवाल सादर करण्याचे निर्देश देण्यात आले आहेत. जिल्हा वार्षिक योजना (सर्वसाधारण) सन 2025-26 अंतर्गत जळगाव जिल्ह्यातील मेहुणबारे, एरंडोल आणि पारोळा येथील ग्रामीण रुग्णालयांमध्ये मॉड्युलर ऑपरेशन थिएटर आणि मॉड्युलर लेबर रूम उभारणीची कामे सुरू आहेत. मात्र, या कामांबाबत काही तक्रारी प्राप्त झाल्याचे पत्रात नमूद करण्यात आले आहे.
प्राप्त माहितीनुसार, या कामांना प्रशासकीय मान्यता देण्यात आली असून आवश्यक निधीही उपलब्ध करून देण्यात आला आहे. तरीदेखील कामांच्या गुणवत्तेबाबत व अंमलबजावणीसंदर्भात तक्रारी प्राप्त झाल्याने प्रशासनाने याकडे गांभीर्याने पाहण्यास सुरुवात केली आहे. विशेष म्हणजे, या संदर्भात श्री. दिनेश कडू भोळे यांनी 9 एप्रिल 2026 रोजी ई-मेलद्वारे तक्रार सादर केली असून त्यामध्ये कामांतील त्रुटी व अटी-शर्तींचे उल्लंघन झाल्याचा उल्लेख करण्यात आला आहे.
या पार्श्वभूमीवर संबंधित कामांची सखोल चौकशी करून आवश्यक कार्यवाही करण्याचे तसेच त्याबाबतचा सविस्तर अहवाल तातडीने सादर करण्याचे आदेश देण्यात आले आहेत. संबंधित विभागाने या प्रकरणात तत्परतेने कारवाई करून वस्तुस्थिती स्पष्ट करावी, असेही निर्देश देण्यात आले आहेत.
