Jalgaon Crime | साक्षीदार न्यूज | जळगाव तालुक्यातील निमखेडी गावात रविवारी रात्री एक भीषण घटना उघडकीस आली असून, एका तरुणाची निर्घृण हत्या झाल्याने संपूर्ण परिसरात खळबळ उडाली आहे.
मृत तरुणाचे नाव सागर साहेबराव सोनवणे (वय २७) असे असुन रविवारी, १४ डिसेंबर रोजी रात्री सुमारे १०:१५ वाजण्याच्या सुमारास सागरवर हल्ला करण्यात आला. हल्लेखोरांनी त्याच्या डोक्यावर धारदार शस्त्राने वार करून त्याला गंभीर जखमी अवस्थेत निमखेडी गावातील राम मंदिर परिसरात टाकून दिल्याचे समोर आले आहे.
घटनेची माहिती मिळताच नातेवाईक आणि ग्रामस्थांनी तातडीने सागरला शासकीय वैद्यकीय महाविद्यालय व रुग्णालयात दाखल केले.मात्र डॉक्टरांनी तपासणीनंतर सागरचा मृत्यू झाल्याचे घोषित केले.
सागर सोनवणे यांच्या पश्चात आई-वडील आणि लहान भाऊ असा परिवार असून, या घटनेमुळे कुटुंबावर दुःखाचा डोंगर कोसळला आहे.
दरम्यान, हा खून नेमका कोणत्या कारणातून झाला, याबाबत अद्याप स्पष्टता नसली तरी, प्राथमिक तपासात जुन्या वादातूनच ही हत्या झाली असावी, असा संशय पोलिसांकडून व्यक्त करण्यात येत आहे.
या प्रकरणी तालुका पोलिसांनी एका संशयिताला ताब्यात घेतले असून, इतर संशयितांचा शोध घेण्यासाठी विशेष पथके रवाना करण्यात आली आहेत.पोलिसांकडून पुढील तपास सुरू आहे.
