viral video जळगाव | सुनिल भोळे | मतदानाच्या दिवशी झालेल्या लाठीमाराच्या घटनेमुळे आधीच चर्चेत असलेले जळगाव पोलिस पुन्हा एकदा वादाच्या केंद्रस्थानी आले आहेत. लाठीमार प्रकरणावरून निर्माण झालेले वातावरण अद्याप शांत होत नाही, तोच सोशल मीडियावर एका डान्स बारमधील व्हिडिओ व्हायरल होत असल्याने नव्या चर्चांना तोंड फुटले आहे.
व्हायरल होत असलेल्या या व्हिडिओमध्ये दोन ते तीन पोलीस कर्मचारी दिसत असल्याचा दावा सोशल मीडियावर केला जात आहे. मात्र, संबंधित हे पोलीस कर्मचारी नेमक्या कोणत्या कारणासाठी डान्स बारमध्ये उपस्थित होते त्यांना काही काम होते का ? याबाबत अद्याप कोणतीही अधिकृत माहिती समोर आलेली नाही. तसेच, हा व्हिडिओ नेमका कधीचा आहे, तो सध्याच्या घटनेशी संबंधित आहे की जुना आहे, याबाबतही अधिकृत पुष्टी झालेली नाही.
दरम्यान, सोशल मीडियावर या व्हिडिओवरून विविध तर्कवितर्क मांडले जात असून, पोलीस प्रशासन या प्रकरणाची दखल घेणार का, याकडे नागरिकांचे लक्ष लागले आहे. मतदानाच्या दिवशीच्या कारवाईनंतर आधीच संवेदनशील झालेल्या वातावरणात हा व्हिडिओ व्हायरल झाल्याने जळगावमधील पोलीस यंत्रणेच्या कार्यपद्धतीवर पुन्हा प्रश्न उपस्थित केले जात आहेत.
