Education News जळगाव |साक्षीदार न्यूज | “केवळ गुणांच्या शर्यतीत न धावता शिस्त, प्रामाणिकपणा आणि चांगुलपणा जोपासून आदर्श नागरिक बना,” असे प्रेरणादायी आवाहन शिक्षण प्रसारक मंडळाचे कार्याध्यक्ष ॲड. सुशील अत्रे यांनी केले. जळगाव येथील शेठ ला.ना. सार्वजनिक विद्यालयात आयोजित इयत्ता ५ वी ते ९ वीच्या वार्षिक पारितोषिक वितरण समारंभात ते बोलत होते.
शुक्रवारी, २० मार्च रोजी सकाळी ९ ते ११ या वेळेत विद्यालयाच्या भैय्यासाहेब गंधे सभागृहात हा सोहळा अत्यंत उत्साहात पार पडला. यावेळी व्यासपीठावर ज्येष्ठ संचालक प्रा. शरदचंद्र छापेकर, श्रीमती रजनी पाठक, डॉ. सौ. विशाखा गर्गे, समन्वयीका सौ. विजयालक्ष्मी परांजपे, मुख्याध्यापक श्री. सचिन देशपांडे, उपमुख्याध्यापक श्री. प्रशांत जगताप, पर्यवेक्षक श्री. संजय वानखेडे आणि सौ. रमा तारे यांची प्रमुख उपस्थिती होती.
सोहळ्याचे ठळक वैशिष्ट्ये
-
सरस्वती पूजन: कार्यक्रमाची सुरुवात माता सरस्वतीच्या प्रतिमा पूजनाने आणि पुष्पांजलीने झाली.
-
सांस्कृतिक रंग: इयत्ता ६ वीच्या विद्यार्थ्यांनी सादर केलेल्या ‘ज्ञानगीताने’ उपस्थितांची मने जिंकली. या गीताला संगीत शिक्षिका श्रीमती संपदा तुंबडे (तबला) आणि श्री. उल्हास ठाकरे (ढोलकी) यांनी साथसंगत केली.
-
प्रगतीचा आढावा: मुख्याध्यापक श्री. सचिन देशपांडे यांनी प्रास्ताविकातून शाळेच्या वर्षभरातील शैक्षणिक यशाचा आलेख मांडला.
-
गौरव सोहळा: शालेय विषयात प्राविण्य मिळवणाऱ्या ६५ गुणवंत विद्यार्थ्यांचा आणि त्यांच्या पालकांचा गुलाबपुष्प, उपयुक्त भेटवस्तू आणि रोख पारितोषिक देऊन सन्मान करण्यात आला.
कार्यक्रमाचे नेटके सूत्रसंचालन श्री. सोमनाथ महाजन यांनी केले, तर सौ. स्वाती एडके यांनी आभार मानले. देणगीदार सूचीचे वाचन सौ. रेवती किन्हीकर यांनी आणि पारितोषिक प्राप्त विद्यार्थ्यांच्या नावांचे वाचन सौ. स्मिता करे यांनी केले. हा सोहळा यशस्वी करण्यासाठी शाळेतील सर्व शिक्षक आणि शिक्षकेतर कर्मचाऱ्यांचे मोलाचे सहकार्य लाभले.
