Jalgaon ZP Health Department | सुनिल भोळे | जिल्हा परिषदेच्या आरोग्य विभागाचा कारभार म्हणजे ‘आंधळं दळतंय आणि कुत्रं पीठ खातंय’ अशी अवस्था झाली आहे. गरिबांच्या जिवाशी खेळणाऱ्या बोगस औषध खरेदी प्रकरणामुळे आता जिल्हा आरोग्य अधिकारी डॉ. सचिन भायेकर यांच्या खुर्चीला सुरुंग लागला असून, त्यांच्या कथित भ्रष्ट आणि मनमानी कारभाराचे पितळ उघडे पडले आहे. या प्रकरणामुळे प्रशासनात नुसती खळबळच उडाली नाही, तर आरोग्य विभागाच्या विश्वासार्हतेचे धिंडवडे निघाले आहेत.
माहिती अधिकार कार्यकर्ते दिनेश भोळे यांनी या भ्रष्टाचाराचे बिंग फोडत प्रशासनाला जागे केले आहे. औषध खरेदीच्या नावाखाली चाललेल्या या ‘गोलमाल’ विरोधात त्यांनी वरिष्ठ स्तरावर पुराव्यासह तक्रार केली होती . भोळे यांनी सादर केलेल्या निवेदनांमुळे वरिष्ठ अधिकाऱ्यांनाही आता या प्रकरणाची गंभीर दखल घेणे भाग पडले आहे.
भायकरांच्या उचलबांगळीची केवळ औपचारिकता बाकी?
मिळालेल्या खात्रीलायक माहितीनुसार, डॉ. भायेकर यांची गच्छंती आता निश्चित मानली जात आहे. प्रशासनातील वरिष्ठ पातळीवर त्यांच्या हकालपट्टीचे वारे जोरात वाहू लागले आहेत. बोगस औषध खरेदी करून रुग्णांच्या जिवाशी खेळणाऱ्या अधिकाऱ्याला पाठीशी घालणे प्रशासनाला आता परवडणारे नाही. त्यामुळे डॉ. भायेकर यांच्या जागी एखाद्या स्वच्छ प्रतिमेच्या आणि खमक्या अधिकाऱ्याची नियुक्ती करण्याच्या हालचाली सुरू झाल्या आहेत.
जनतेचा संताप: नुसती बदली नको, कठोर कारवाई करा!
केवळ बदली करून या प्रकरणावर पडदा टाकू नका, तर या महाघोटाळ्याची सखोल चौकशी करून दोषींना गजाआड करा, अशी संतप्त मागणी आता जळगावकर नागरिक करत आहेत. आरोग्य विभागातील या भ्रष्ट साखळीचा पर्दाफाश झाल्याशिवाय राहणार नाही.
प्रशासन आता काय ‘ठोस’ पावले उचलते आणि औषध खरेदीतील या भ्रष्टासुरांचा बंदोबस्त कसा करते, हे पाहणे कमालीचे ठरणार आहे.
