rohit pawar firing | साक्षीदार न्यूज | जामखेड-बीड रोडवरील न्यू कावेरी हॉटेल परिसरात बुधवारी मध्यरात्री घडलेल्या गोळीबाराच्या घटनेमुळे संपूर्ण परिसरात एकच खळबळ उडाली आहे. सात ते आठ जणांच्या संशयित टोळीने हॉटेलवर अचानक हल्ला करत अंदाधुंद गोळीबार केल्याची घटना घडली असून, या हल्ल्यात हॉटेल मालक रोहित अनिल पवार जखमी झाले आहेत.
प्राथमिक माहितीनुसार, रोहित पवार हे रात्रीच्या सुमारास आपल्या हॉटेलसमोर उभे असताना एक स्विफ्ट कार तेथे आली. कारमधून पाच ते सात जण खाली उतरले. त्यापैकी तिघांकडे गावठी कट्टे असल्याचे सांगण्यात येत असून, त्यांनी थेट गोळीबार सुरू केला.
गोळीबार सुरू होताच रोहित पवार यांनी जीव वाचवण्यासाठी हॉटेलच्या मागील बाजूने पळ काढण्याचा प्रयत्न केला. मात्र, या दरम्यान त्यांच्या पायाला गोळी लागली. जखमी अवस्थेत काही अंतर पळाल्यानंतर ते अंधारात लपून बसले.
दरम्यान, हल्लेखोरांनी पुन्हा हॉटेल परिसरात येत मोठ्या प्रमाणात तोडफोड केली. एवढ्यावरच न थांबता हॉटेल मालकांच्या कारचीही तोडफोड करण्यात आली. या घटनेनंतर परिसरात भीतीचे वातावरण निर्माण झाले आहे.
जखमी रोहित पवार यांना तातडीने अहिल्यानगर येथील खासगी रुग्णालयात उपचारासाठी दाखल करण्यात आले असून, त्यांची प्रकृती स्थिर असल्याची माहिती सूत्रांकडून मिळत आहे.
घटनेची माहिती मिळताच पोलीस घटनास्थळी दाखल झाले असून, हल्लेखोरांचा शोध सुरू आहे. या प्रकरणात एका संशयिताला ताब्यात घेण्यात आले असून, उर्वरित आरोपींचा शोध घेण्यासाठी विशेष पथक रवाना करण्यात आले आहे. गोळीबारामागील नेमके कारण काय, याचा पोलीस तपास सुरू आहे.
