यावल : प्रतिनिधी : यावल तालुक्यातील किनगाव येथे शासनाने उभारलेले भव्य ग्रामीण रुग्णालय सध्या वापराविना पडून असल्याचे चित्र समोर आले आहे. तब्बल दोन ते तीन वर्षांपूर्वी या रुग्णालयाची इमारत पूर्ण झाली असतानाही प्रत्यक्ष आरोग्य सेवा अद्याप सुरू झालेली नाही. त्यामुळे कोट्यवधी रुपयांचा खर्च करून उभारलेली ही इमारत केवळ ‘शोपीस’ ठरत असल्याची चर्चा परिसरात सुरू आहे.
ग्रामीण भागातील नागरिकांना चांगल्या दर्जाची आरोग्य सेवा मिळावी या उद्देशाने येथे आधुनिक सुविधांनी सुसज्ज असे ग्रामीण रुग्णालय उभारण्यात आले. मात्र इमारत तयार असूनही डॉक्टर आणि आवश्यक कर्मचारी वर्गाची पूर्ण नियुक्ती अद्याप झालेली नसल्याने रुग्णालय सुरू होऊ शकलेले नाही. यामुळे स्थानिक नागरिकांमध्ये नाराजी वाढत आहे.
नागरिकांचा मुख्य प्रश्न असा आहे की, किनगाव ग्रामीण रुग्णालयासाठी जिल्हा शल्यचिकित्सकांकडून डॉक्टर आणि कर्मचारी वर्गाची नियुक्ती नेमकी केव्हा होणार? इमारत तयार असूनही सेवा सुरू होत नसल्याने प्रशासनाच्या कार्यपद्धतीवरही प्रश्न उपस्थित केले जात आहेत.
दरम्यान, ग्रामीण रुग्णालय सुरू न झाल्यामुळे किनगाव येथील प्राथमिक आरोग्य केंद्रावर मोठा ताण पडत आहे. मर्यादित जागा आणि साधनसामग्री असतानाही डॉक्टर व कर्मचारी नागरिकांना सेवा देण्याचा प्रयत्न करत आहेत. एका छोट्याशा खोलीत अनेक रुग्णांची तपासणी करावी लागत असल्याने आरोग्य कर्मचाऱ्यांसाठी ही परिस्थिती आव्हानात्मक ठरत आहे.
जागेचा अभाव, वाढती रुग्णसंख्या आणि अपुरी साधने अशा परिस्थितीतही प्राथमिक आरोग्य केंद्रातील डॉक्टर व कर्मचारी नागरिकांची सेवा देत आहेत. मात्र ग्रामीण रुग्णालय सुरू नसल्यामुळे नागरिकांचा रोषही त्यांनाच सहन करावा लागत असल्याचे चित्र आहे.
दरम्यान, गेल्या काही वर्षांपासून ग्रामीण रुग्णालय लवकरच सुरू होईल अशी आश्वासने लोकप्रतिनिधींकडून दिली जात आहेत. मात्र प्रत्यक्षात सेवा सुरू न झाल्याने या आश्वासनांवरच वेळ जात असल्याची टीका नागरिक करत आहेत.
किनगाव आणि परिसरातील हजारो नागरिकांना दर्जेदार आरोग्य सुविधा मिळाव्यात यासाठी उभारलेले हे ग्रामीण रुग्णालय लवकरात लवकर सुरू करावे, अशी मागणी आता जोर धरू लागली आहे. जिल्हा शल्यचिकित्सकांनी तातडीने डॉक्टर आणि संपूर्ण कर्मचारी वर्गाची नियुक्ती करून रुग्णालय सुरू करावे, अशी मागणी नागरिकांकडून केली जात आहे.
आता परिसरातील नागरिकांच्या मनात एकच प्रश्न आहे —
किनगावचे ग्रामीण रुग्णालय प्रत्यक्षात सुरू होणार तरी केव्हा?
