Maharajswa Shibir | जळगाव | शासकीय योजनांचा लाभ शेवटच्या घटकापर्यंत पोहोचावा या उद्देशाने, जिल्हाधिकारी रोहन घुगे यांच्या मार्गदर्शनाखाली मेहरुण परिसरातील एल.एच. पाटील शाळेत ‘छत्रपती शिवाजी महाराज महाराजस्व समाधान शिबीर’ उत्साहात पार पडले. विशेषतः विमुक्त जाती व भटक्या जमातीतील बांधवांसाठी आयोजित या शिबिरात ओळखपत्र, विविध दाखले आणि प्रमाणपत्रे जागेवरच उपलब्ध करून देण्यात आली.
वस्तीतील नागरिकांची कागदपत्रांची चिंता मिटली मेहरुण तलावाजवळील वस्तीत राहणाऱ्या नागरिकांना शासकीय कार्यालयांचे उंबरठे झिजवावे लागू नये, यासाठी प्रशासनाने थेट वस्तीजवळ हे शिबीर भरवले होते. या मोहिमेत सुमारे ३६ कुटुंबांनी उत्स्फूर्त सहभाग नोंदवला. शिबिरात १० स्वतंत्र कक्षांच्या माध्यमातून नागरिकांना मार्गदर्शन आणि तांत्रिक सहकार्य करण्यात आले.
प्रशासन नागरिकांच्या सेवेसाठी तत्पर: प्रांताधिकारी विनय गोसावी “प्रशासन केवळ कार्यालयातून नाही तर प्रत्यक्ष मैदानात उतरून नागरिकांच्या समस्या सोडवण्यासाठी कटिबद्ध आहे,” असे प्रतिपादन प्रांताधिकारी विनय गोसावी यांनी प्रास्ताविकात केले. तांत्रिक त्रुटींमुळे कोणाचे काम थांबले असेल, तर पुन्हा शिबीर आयोजित करण्याचे आश्वासनही त्यांनी दिले.
निराधार आणि दिव्यांगांना दिलासा संजय गांधी निराधार योजनेच्या तहसीलदार रुपाली काळे यांनी शासनाच्या आर्थिक मदतीबद्दल सविस्तर माहिती दिली. निराधार महिलांना दरमहा १५०० रुपये आणि दिव्यांग निराधारांना २५०० रुपये अनुदान दिले जात असल्याचे सांगत त्यांनी पात्र महिलांना नोंदणी करण्याचे आवाहन केले. या प्रसंगी मनपा आरोग्य अधिकारी, तलाठी आणि ‘अनुलोम’ संस्थेचे प्रतिनिधी उपस्थित होते.
