Nalasopara साक्षीदार न्युज । 24 मार्च 2025 । महाराष्ट्रातील नालासोपारा येथे आज एक अत्यंत भयानक आणि खळबळजनक घटना घडली आहे. सावत्र पित्याकडून सतत होणाऱ्या लैंगिक अत्याचाराला कंटाळून 24 वर्षीय तरुणीने आपल्या वडिलांवर चाकूने हल्ला करत त्यांचे गुप्तांग कापून टाकले. ही घटना सोमवारी दुपारी 12 च्या सुमारास नालासोपारा पूर्वेच्या संतोषभुवन परिसरात घडली, ज्यामुळे संपूर्ण परिसरात एकच खळबळ उडाली आहे.
तुळींज पोलिसांनी दिलेल्या माहितीनुसार, हल्लेखोर तरुणीचे सावत्र वडील विजय भारती हे मागील दोन वर्षांपासून तिच्यावर लैंगिक अत्याचार करत होते. विजय भारती हे तिच्या आईचे दुसरे पती आहेत. सोमवारी पुन्हा एकदा त्यांनी तरुणीवर शरीरसंबंधासाठी दबाव टाकला. यामुळे संतापलेल्या तरुणीने चाकूने त्यांच्यावर हल्ला केला आणि त्यांचे गुप्तांग कापून टाकले. हल्ल्यानंतर विजय भारती यांनी बचावासाठी घराबाहेर पळ काढला, परंतु तरुणीने रस्त्यावर त्यांना गाठून पुन्हा त्यांच्यावर हल्ला केला . या घटनेचा व्हिडिओ स्थानिकांनी काढला असून, त्यात तरुणी हातात चाकू घेऊन फिरताना दिसत आहे.
हल्ल्यात विजय भारती गंभीर जखमी झाले असून, त्यांना तातडीने रुग्णालयात दाखल करण्यात आले आहे. त्यांची प्रकृती गंभीर असल्याचे सांगितले जात आहे. दरम्यान, तुळींज पोलिसांनी तरुणीला ताब्यात घेतले असून, तिच्यावर गुन्हा दाखल करून पुढील तपास सुरू केला आहे. पोलिसांनी घटनास्थळावरून चाकूसह इतर पुरावे जप्त केले आहेत.
या घटनेमुळे नालासोपारा परिसरात तणावाचे वातावरण आहे. स्थानिकांमध्ये या प्रकरणाची जोरदार चर्चा सुरू असून, अनेकांनी तरुणीच्या कृत्याला अत्याचाराच्या परिणामाचे फलित मानले आहे. पोलिस या प्रकरणाचा सर्व बाजूंनी तपास करत असून, आणखी काही माहिती समोर येण्याची शक्यता आहे.
