Beed Tuljapur Highway | NH-52 वर धडकी भरवणारा प्रवास! बीड–तुळजापूर मार्गावरील १० ‘डेंजर झोन’ जाहीर, पोलिसांचा हाय अलर्ट

Beed Tuljapur Highway | साक्षीदार न्यूज | राज्यात गेल्या काही दिवसांपासून चोरी, लुटमार आणि दरोड्याच्या घटनांमध्ये चिंताजनक वाढ होत असल्याचे चित्र आहे. त्यातच धुळे–सोलापूर राष्ट्रीय महामार्ग क्रमांक ५२ (NH-52) वरील बीड ते तुळजापूर दरम्यानचा टप्पा सध्या गुन्हेगारांचा मुख्य निशाणा ठरला आहे. या मार्गावर धावत्या वाहनांवर जबरी चोरी, लुटमार आणि दरोड्याच्या घटना सातत्याने समोर येत असल्याने प्रवाशांमध्ये भीतीचे वातावरण पसरले आहे.

या वाढत्या गुन्हेगारी पार्श्वभूमीवर बीड व धाराशिव पोलिसांसह महामार्ग सुरक्षा पथकाने संयुक्त कारवाई सुरू केली असून प्रवाशांसाठी सतर्कतेचा इशारा जारी करण्यात आला आहे. विशेष म्हणजे या मार्गावरील मांजरसुंबा घाटासह एकूण १० ठिकाणे ‘धोकादायक हॉटस्पॉट’ म्हणून घोषित करण्यात आली आहेत.

संयुक्त ‘बीड ब्रेक’ मोहीम सुरू

गुन्हेगारी घटनांची गंभीर दखल घेत बीड व धाराशिव पोलीस प्रशासनाने एकत्रित ‘बीड ब्रेक’ मोहीम हाती घेतली आहे. या मोहिमेंतर्गत महामार्गावर कडक गस्त, संशयितांची तपासणी आणि रात्रीच्या वेळी विशेष पथक तैनात करण्यात आले आहे. यासोबतच प्रवाशांना अधिक सतर्क राहण्याचे आवाहनही करण्यात आले आहे.

कोण होत आहेत गुन्हेगारांचे लक्ष्य?

पोलीस सूत्रांच्या माहितीनुसार, रात्रीच्या वेळी या महामार्गावर गुन्ह्यांचे प्रमाण अधिक वाढले आहे. डोंगराळ, निर्मनुष्य आणि अंधाऱ्या परिसराचा फायदा घेत चोरट्यांच्या टोळ्या प्रवाशांना वेगवेगळ्या पद्धतीने अडवत आहेत.
विशेषतः —

• लांब पल्ल्याचे मालवाहतूक करणारे ट्रक चालक
• एकटे प्रवास करणारे चारचाकी वाहन चालक
• तसेच दुचाकीस्वार

यांना प्रामुख्याने लक्ष्य केले जात आहे.

काही ठिकाणी कृत्रिम अपघात घडवून मदतीच्या बहाण्याने वाहन थांबवणे, तर कधी रस्त्यावर खिळे, जॅक किंवा लाकडी ओंडके टाकून वाहन अडवून शस्त्रांचा धाक दाखवून हल्ले केले जात असल्याचे प्रकार समोर आले आहेत.
विशेषतः बीडमधील मांजरसुंबा घाट आणि धाराशिवमधील येडशी बायपास हे अतिशय संवेदनशील क्षेत्र घोषित करण्यात आले आहेत. येथे दुभाजकातील झाडीत गुन्हेगार लपून बसून वाहन अडवत असल्याचे निदर्शनास आले आहे.

गुन्हे रोखण्यासाठी पोलिसांची रणनिती

या घटनांवर आळा घालण्यासाठी पोलीस अधीक्षक कार्यालयाने विशेष सुरक्षायंत्रणा उभारली आहे.

• महामार्ग सुरक्षा पथकासह एकूण ७ गस्ती वाहने रात्रंदिवस गस्त घालणार
• हॉटेल चालक, ढाबा मालक आणि पेट्रोल पंप कर्मचाऱ्यांना संशयास्पद हालचालींची त्वरित माहिती देण्याचे आदेश
• महामार्गालगतच्या गावांतील सरपंच, पोलीस पाटील आणि ग्राम सुरक्षा दल ‘अ‍ॅक्टिव्ह मोड’वर
• संशयास्पद हालचाली टिपण्यासाठी ड्रोनचा वापर
• तसेच सोशल मीडियाच्या माध्यमातून आपत्कालीन संपर्क क्रमांक प्रसिद्ध

अशी बहुस्तरीय यंत्रणा राबवली जात आहे.

जाहीर करण्यात आलेले १० धोकादायक हॉटस्पॉट्स

प्रवाशांसाठी अत्यावश्यक सूचना

• नैसर्गिक गरज किंवा वाहन बिघाड झाल्यास फक्त गर्दी आणि प्रकाश असलेल्या ठिकाणीच थांबा
• रस्त्यावर संशयास्पद वस्तू किंवा अनोळखी व्यक्ती मदतीच्या बहाण्याने थांबवत असतील, तर गाडी थांबवू नका
• त्वरित ११२ या क्रमांकावर संपर्क साधा
• महामार्गाच्या दुभाजकाला खेटून वाहन चालवणे टाळा

प्रवाशांचे सहकार्य आणि पोलिसांच्या वाढीव कारवाईमुळे या गुन्हेगारीवर लवकरच नियंत्रण मिळवता येईल, असा विश्वास पोलीस प्रशासनाने व्यक्त केला आहे.

Beed Tuljapur Highway