साक्षीदार | ८ नोव्हेबर २०२३ | जळगाव शहरातील राजकमल टॉकीज आणि सुभाष चौक परिसर या दोन ठिकाणी अवैधरीत्या सुरू असलेल्या सट्टा, मटका क्लबवर उपविभागीय पोलिस अधिकारी संदीप गावित यांच्या पथकाने छापा टाकून चार जणांवर कारवाई केली. या दोन ठिकाणच्या कारवाईत एकूण ३ हजार ३९० रुपयांचा मुद्देमाल जप्त करण्यात आला.
मिळालेल्या माहितीनुसार, शहरातील शहर पोलिस ठाण्याच्या हद्दीतील सुभाष डेअरी आणि शनिपेठ पोलिस ठाण्याच्या हद्दीतील राजकमल टॉकीज परिसरात अवैधरीत्या सट्टा व मटका क्लब सुरू असल्याची गोपनीय माहिती संदीप गावित यांना मिळाली. त्यांनी पथकाला कारवाई करण्याच्या सूचना दिल्या. मंगळवार, ७ नोव्हेंबर रोजी दुपारी पोकों सचिन साळुंखे, नाना तंवर, पोहेकॉ रवींद्र बोदवडे, राहुल पाटील, बालाजी बारी, मनोहर वानखेडे यांनी दोन्ही ठिकाणी छापा टाकून संशयित सचिन आनंदा जाधव (२५, रा. जोशीपेठ), संजय भाऊलाल चौधरी आणि सखाराम भटू चौधरी या तिघांना ताब्यात घेतले तर एकजण फरार झाला आहे. या कारवाईत ३ हजार ३९० रुपये किमतीचा मुद्देमाल जप्त करण्यात आला आहे. याप्रकरणी चार जणांविरुद्ध गुन्हा दाखल करण्यात आला.
