Chennai PhD Ceremony | साक्षीदार न्यूज | भुसावल थर्मल पावर स्टेशनचे सेवानिवृत्त मुख्य अभियंता राजेंद्र (आर. आर.) बाविस्कर यांना चेन्नई येथे आयोजित विशेष समारंभात मानद पीएचडी (डॉक्टरेट इन ऍडमिनिस्ट्रेशन) प्रदान करण्यात आली. साउथ वेस्टर्न युनिव्हर्सिटीच्या वतीने ही मानद पदवी त्यांना मान्यवरांच्या हस्ते बहाल करण्यात आली.
राजेंद्र बाविस्कर यांनी महाराष्ट्र राज्य वीज मंडळ (एम.एस.ई.बी.) सेवेत सहाय्यक अभियंता म्हणून आपल्या कारकिर्दीची सुरुवात केली. त्यानंतर उपकार्यकारी अभियंता, कार्यकारी अभियंता पदांवर त्यांनी यशस्वीपणे जबाबदाऱ्या पार पाडल्या. आपल्या कार्यकुशलतेच्या आणि प्रशासनातील उत्कृष्ट कामगिरीच्या जोरावर त्यांनी मुख्य अभियंता पदापर्यंत मजल मारली आणि त्या पदावरून ते सेवानिवृत्त झाले.
प्रशासनातील समृद्ध अनुभव, सामाजिक कार्यातील योगदान, तसेच वाचन आणि वैचारिक क्षेत्रातील व्यासंग यांची दखल घेत विद्यापीठाच्या वतीने त्यांना ही मानद डॉक्टरेट प्रदान करून सन्मानित करण्यात आले आहे.
या उल्लेखनीय गौरवाबद्दल विविध सामाजिक संस्था, ज्येष्ठ नागरिक संघ, तसेच कामगार संघटनांच्या वतीने राजेंद्र बाविस्कर यांचे अभिनंदन करण्यात येत असून, सर्व स्तरांतून त्यांच्यावर शुभेच्छांचा वर्षाव होत आहे .
