Repo Rate Cut EMI Savings साक्षीदार न्युज । रिझर्व्ह बँक ऑफ इंडियाने (आरबीआय) आज रेपो रेटमध्ये 0.25 टक्क्यांची कपात जाहीर केली असून, आता हा दर 6 टक्क्यांवर आला आहे. यामुळे कर्जावरील व्याजदर कमी होण्याची शक्यता आहे, ज्याचा थेट फायदा कर्जदारांना मिळणार आहे. विशेष म्हणजे, तुमचा मासिक ईएमआय (Equated Monthly Installment) कमी होऊ शकतो, ज्यामुळे तुम्ही महिन्याला 1,000 ते 6,000 रुपये वाचवू शकता. ही बचत कर्जाच्या रकमेवर आणि कालावधीवर अवलंबून असेल.
आरबीआयच्या या निर्णयानंतर सेंट्रल बँक आणि इतर बँकाही लवकरच व्याजदरात कपात करू शकतात. रेपो रेट कमी झाल्याने बँकांना स्वस्त दरात कर्ज मिळेल, आणि हा लाभ ग्राहकांपर्यंत पोहोचवण्यासाठी व्याजदर कमी करण्याची शक्यता आहे. आता पाहूया, वेगवेगळ्या कर्जरकमांवर तुमची बचत किती होऊ शकते, असे स्पष्ट करत राऊल कपूर (को-सीईओ, अँड्रोमेडा सेल्स अँड डिस्ट्रिब्युशन प्रा. लि.) यांनी माहिती दिली.
गृहकर्जावर ईएमआयची बचत
30 लाखांचे कर्ज: सध्याच्या 9 टक्के व्याजदरापासून 0.5 टक्क्यांनी कपात होऊन 8.5 टक्के झाल्यास, मासिक ईएमआय 26,247 रुपयांवरून कमी होऊन 25,071 रुपये होईल. यातून महिन्याला 1,176 रुपये आणि 20 वर्षांत 2.82 लाख रुपये वाचू शकता.
50 लाखांचे कर्ज: सध्याचा ईएमआय 43,745 रुपये असताना तो 41,785 रुपये होईल, ज्यामुळे महिन्याला 1,960 रुपये आणि 20 वर्षांत 4.70 लाख रुपयांची बचत होईल.
70 लाखांचे कर्ज: 61,243 रुपये असलेला ईएमआय 58,499 रुपये होईल, ज्यामुळे महिन्याला 2,744 रुपये आणि एकूण 6.58 लाख रुपयांची बचत शक्य आहे.
1 कोटीचे कर्ज: सध्याचा ईएमआय 87,490 रुपयांवरून 83,570 रुपये होईल, ज्यामुळे महिन्याला 3,920 रुपये वाचतील.
1.5 कोटीचे कर्ज: 1,31,235 रुपये असलेला ईएमआय 1,25,355 रुपये होईल, ज्यामुळे महिन्याला 5,880 रुपये आणि दीर्घकाळात मोठी बचत होईल.
रेपो रेट कपातीचा हा निर्णय अर्थव्यवस्थेला गती देण्यासाठी महत्त्वाचा मानला जात आहे. व्याजदरात होणारी ही कपात विशेषतः गृहकर्ज आणि इतर कर्जदारांसाठी दिलासादायक ठरेल, ज्यामुळे घर खरेदी आणि गुंतवणुकीस चालना मिळू शकते.
