Shiv Sena Event | साकळीत शिवसेनेचा मेगा शक्तीप्रदर्शन! ४०० कार्यकर्त्यांचा एकाचवेळी प्रवेश, आ. चंद्रकांत सोनवणे यांचा विकासाचा दावा

Shiv Sena Event यावल | मिलिंद जंजाळे | साकळी येथे शिवसेना (शिंदे गट) पक्षाचा जंगी कार्यकर्ता प्रवेश सोहळा मोठ्या उत्साहात पार पडला. भवानी माता मंगल कार्यालयात आयोजित या कार्यक्रमाच्या अध्यक्षस्थानी आमदार चंद्रकांत बळीराम सोनवणे होते.

- Advertisement -

यावेळी बोलताना आमदार सोनवणे यांनी सांगितले की, शिवसेना पक्ष हा सर्वसामान्य जनतेशी घट्ट जोडलेला असून तो एक कुटुंबाप्रमाणे कार्य करतो. साकळी व पंचक्रोशीशी आपला वडिलोपार्जित संबंध असल्याने या भागाशी विशेष जिव्हाळा असल्याचे त्यांनी नमूद केले.

माजी आमदार सौ. लताताई सोनवणे यांच्या सहकार्याने तसेच उपमुख्यमंत्री एकनाथ शिंदे यांच्या नेतृत्वाखाली गेल्या अकरा वर्षांत मतदारसंघात विविध विकासकामे राबविण्यात आली. त्यामुळे ‘हक्काचा आमदार’ अशी ओळख निर्माण झाल्याचेही त्यांनी सांगितले.

- Advertisement -

या बैठकीत आगामी स्थानिक स्वराज्य संस्था निवडणुकांच्या पार्श्वभूमीवर पक्ष संघटन बळकट करणे, ग्रामीण भागात शाखा विस्तार करणे तसेच मतदार याद्यांचे सर्वेक्षण याबाबत सविस्तर मार्गदर्शन करण्यात आले. शेती, पाणी, माती आणि विविध नागरी प्रश्नांवरही आमदार सोनवणे यांनी अभ्यासपूर्ण भूमिका मांडली.

कार्यक्रमाला बबलू कोळी, सूर्यभान पाटील, गोटू सोनवणे, रॉकी पाटील, सुभाष साळुंखे, भरत चौधरी, तुकाराम महाजन, अशोक महाजन, महेंद्र चौधरी, दिनकर माळी, विनोद खेवलकर, प्रमोद सोनवणे यांसह अनेक मान्यवर उपस्थित होते.

या प्रवेश सोहळ्यात विविध पक्षांतील पदाधिकारी, सरपंच, उपसरपंच, ग्रामपंचायत सदस्य आणि कार्यकर्त्यांनी मोठ्या संख्येने शिवसेनेत प्रवेश केला. यात साकळीचे लोकनियुक्त सरपंच दिपक पाटील, युनुसशेठ मंसूरी, न्याजोद्दीनशेठ, साहेबराव बडगुजर, रितेश (रॉकी) पाटील, संदीप पाटील, अशोक पाटील, देविदास धनगर, मनोहर पाटील यांच्यासह सुमारे ४०० कार्यकर्त्यांचा समावेश होता.

विशेष म्हणजे साकळी दिव्यांग संघटनेचे प्रमुख वासुदेव बडगुजर यांच्या नेतृत्वाखाली २३ दिव्यांग बांधवांनीही शिवसेनेत प्रवेश केला. आमदार सोनवणे यांनी स्वतः त्यांच्या जागेवर जाऊन पक्षप्रवेश करून घेतल्याने कार्यक्रमाला भावनिक रंग चढला.

या मोठ्या पक्षप्रवेशामुळे साकळी, शिरसाड आणि परिसरात शिवसेना पक्षाची ताकद लक्षणीयरीत्या वाढणार असल्याचे राजकीय वर्तुळात चर्चिले जात आहे.