Suicide Attempt Political साक्षीदार न्युज । महाराष्ट्रात घडलेल्या दोन धक्कादायक घटनांनी राजकीय आणि सामाजिक वर्तुळात खळबळ माजवली आहे. सांगलीतील राष्ट्रवादीचे नेते आणि माजी महापौर सुरेश पाटील यांनी निवासस्थानी गळफास घेऊन आत्महत्येचा प्रयत्न केला, तर लातूर महानगरपालिकेचे आयुक्त बाबासाहेब मनोहरे यांनी डोक्यात गोळी झाडून स्वत:ला संपवण्याचा प्रयत्न केला. या दोन्ही घटनांनी सर्वांनाच धक्का बसला असून, त्यामागील कारणांचा शोध घेतला जात आहे.
सांगलीत घडलेल्या घटनेत सुरेश पाटील यांनी नेमीनाथनगर येथील घरी साडीने गळफास लावण्याचा प्रयत्न केला. कुटुंबीयांनी वेळीच लक्षात आणल्यानंतर त्यांना तातडीने उषःकाल रुग्णालयात दाखल करण्यात आले. सध्या ते अतिदक्षता विभागात असून, त्यांची प्रकृती स्थिर असल्याची माहिती डॉक्टरांनी दिली आहे. गेल्या तीन दशकांपासून राजकारण, शिक्षण आणि समाजकारणात सक्रिय असलेले सुरेश पाटील गेल्या वर्षभरापासून सार्वजनिक जीवनापासून दूर होते. रविवारी ते सुरश्री संगीत महोत्सवाच्या उद्घाटनाला हजर राहिले होते, पण सोमवारी सकाळी त्यांनी हे टोकाचं पाऊल उचललं. यामागे नेमकं कारण काय, हे अद्याप स्पष्ट झालेलं नाही. विश्रामबाग पोलिस ठाण्यात या प्रकरणाची नोंद झाली असून, तपास सुरू आहे.
दुसरीकडे, लातूरमध्ये शनिवारी रात्री बाबासाहेब मनोहरे यांनी स्वत:च्या डोक्यात गोळी झाडून आत्महत्येचा प्रयत्न केला. या प्रकरणात एक नवीन माहिती समोर आली आहे. नातेवाइकांच्या दाव्यानुसार, शनिवारी रात्री मनोहरे यांना एक फोन आला होता. त्या फोनवर बोलल्यानंतर त्यांनी खोलीत जाऊन स्वत:वर गोळी झाडली. हा फोन कोणाचा होता आणि त्यात नेमकं काय बोलणं झालं, याचा शोध पोलिस घेत आहेत. मनोहरे यांच्यावर सध्या उपचार सुरू असून, या घटनेने लातूरकरांनाही धक्का बसला आहे.
या दोन्ही घटनांनी सांगली आणि लातूरमधील जनतेसह राजकीय वर्तुळात चर्चेला उधाण आलं आहे. सुरेश पाटील आणि बाबासाहेब मनोहरे यांनी अशी टोकाची पावलं का उचलली? यामागे वैयक्तिक कारणं आहेत की राजकीय दबाव? या प्रश्नांची उत्तरं शोधण्यासाठी पोलिसांचा तपास सुरू आहे.
