Sangram Thopate Bjp Join साक्षीदार न्युज । गेली ४० वर्षे पुण्यातील भोर मतदारसंघावर आपले वर्चस्व कायम ठेवणारे थोपटे घराणे आता काँग्रेसच्या गोटातून बाहेर पडण्याच्या उंबरठ्यावर आहे. माजी आमदार संग्राम थोपटे यांनी काँग्रेसला सोडचिठ्ठी देऊन 22 एप्रिलला मुंबईत भाजपमध्ये प्रवेश करण्याचा निर्णय घेतला आहे. या प्रवेश सोहळ्यासाठी मुख्यमंत्री देवेंद्र फडणवीस उपस्थित राहणार आहेत. थोपटे यांनी काँग्रेसमध्ये दीर्घकाळ निष्ठा ठेवली, तरी पक्षाने त्यांना सातत्याने डावलल्याची खंत व्यक्त करत हा मोठा राजकीय बदल जाहीर केला.
संग्राम थोपटे हे माजी मंत्री अनंतराव थोपटे यांचे पुत्र असून, त्यांना राजकीय वारसा वडिलांकडून मिळाला. अनंतराव थोपटे यांनी सहा वेळा भोरचे आमदार म्हणून काम केले, तर संग्राम यांनी 2009, 2014 आणि 2019 मध्ये सलग तीनवेळा यश मिळवले. मात्र, 2024 च्या निवडणुकीत राष्ट्रवादीच्या शंकर मांडेकर यांच्याकडून त्यांचा पराभव झाला. या पराभवासह पक्षातून मिळालेल्या वागणुकीमुळे त्यांच्यातील नाराजी वाढली.
भोरमधील नुकत्याच झालेल्या कार्यकर्ता मेळाव्यात संग्राम यांनी आपल्या मनातील खंत मांडली. “मी तीन वेळा निवडून आलो, पण काँग्रेसने मला कधीही मोठी जबाबदारी दिली नाही. 2019 मध्ये पक्षाला 12 मंत्रिपदे मिळाली, पुण्यासाठीही संधी होती, पण मला मंत्रिपद मिळाले नाही. नाना पटोले यांच्यापाठोपाठ विधानसभा अध्यक्षपद किंवा विरोधी पक्षनेतेपदाची अपेक्षा होती, पण तीही पूर्ण झाली नाही,” असे ते म्हणाले. त्यांनी पुढे सांगितले की, निवडणूक फॉर्म भरण्यासाठी पक्षश्रेष्ठींना बोलावले, पण त्यांनी वेळ दिली नाही. सत्तेत असताना देखील निधी आणि विकासकामांसाठी मदत मिळाली नाही, अशी खंत त्यांनी व्यक्त केली.
थोपटे यांनी दोन दिवसांपूर्वी काँग्रेसचा राजीनामा दिला असून, त्यांनी सांगितले की, विकासाला गती देण्यासाठी पक्ष बदलणे गरजेचे आहे. कार्यकर्त्यांनीही भाजपमध्ये जाण्याचा सल्ला दिल्याचे त्यांनी नमूद केले. या निर्णयामुळे भोरमधील राजकीय वातावरण तापले असून, काँग्रेसला पुन्हा एक मोठा धक्का बसला आहे. आता भाजप थोपटे यांना कोणती जबाबदारी देते, हे पाहणे महत्त्वाचे ठरणार आहे, विशेषतः सध्याच्या निवडणूक-मुक्त काळात.
