साक्षीदार | २३ ऑक्टोबर २०२३ | ड्रग्ज माफिया ललित पाटीलला मुंबई पोलिसांनी अटक केल्यानंतर अनेक धागेदोरे समोर येत आहे. सध्या राज्यातील पोलीस अँक्शन मोडवर आले असून मुंबई, पुणे, नाशिकसह छत्रपती संभाजीनगर येथे छापेमारी करत पोलिसांनी कोट्यवधी रुपयांचं ड्रग्ज जप्त केलं आहे. या प्रकरणात आणखी काही धागेदोरे हाती लागण्याची शक्यता आहे. अशातच शिवसेना शिंदे गटाचे आमदार संजय शिरसाट यांनी एक खळबळजनक दावा केला आहे.
राज्यातील ड्रग्ज प्रकरण गांभीर्याने घेण्याची गरज आहे. या प्रकरणात अनेक आमदार तसेच खासदारांचा समावेश असण्याची शक्यता आहे, असा दावा संजय शिरसाट यांनी केला आहे. त्यांच्या या दाव्याने मोठी खळबळ उडाली आहे. ड्रग्ज प्रकरणात कोणत्याही पक्षाच्या नेत्याचा हात असेल, तर त्याला तातडीने जेलमध्ये टाका अशी मागणी सुद्धा शिरसाट यांनी केली आहे. यावेळी त्यांनी राज्यातील ड्रग्ज प्रकरणावर भाष्य केलं. सरकारने ड्रग्स प्रकरण गांभीर्याने घ्यावे. यामध्ये राज्यातील आमदार-खासदार सहभागी आहेत, असा दावा शिरसाट यांनी केला.
