साक्षीदार | १४ नोव्हेबर २०२३ | अमळनेर तालुक्यातील कावपिंप्री येथे सोमवार दि. १२ रोजी सायंकाळी ५ वाजेच्या सुमारास शौचालयाच्या टाकीत पडून दोन वर्षांच्या चिमुकल्याचा दुदैवी मृत्यू झाल्याची घटना घडली आहे. यात भूषण दिलीप सोनवणे (वय-२) असे मयत चिमुकल्याचे नाव आहे. अमळनेर पोलीस स्टेशनला अकस्मात मृत्यूची नोंद करण्यात आली आहे.
मिळालेल्या माहितीनुसार, अमळनेर तालुक्यातील कावपिंप्री येथील अशोक सोनवणे यांच्या नवीन घराचे बांधकाम सुरू असल्याने त्याठिकाणी शौचालयासाठी लागणारी टाकीचे बांधकाम करण्यात आले असून ही टाकी पुर्णपणे पाण्याने भरलेली होती. या टाकीजवळ खेळतांना भषण दिलीप सोनवणे (वय २ वर्ष) हा चिमुकला टाकीत पडल्याने त्याचा पाण्यात बुडून मृत्यू झाला. त्या आजोबा लिलाधर गोविंदा सोनवणे यांना शौचालयाच्या टाकीत चिमुकला भूषण हा टाकीत मृतवस्थेत दिसून आला. त्याला बाहेर काढून तातडीने अमळनेर येथील ग्रामीण रूग्णालयात दाखल केले असता वैद्यकीय अधिकारी यांनी मयत घोषीत केले. याबाबत अमळनेर पोलिसात अकस्मात मृत्यूची नोंद करण्यात आली आहे.
