Defence Forces भडगाव | गोरख माळी | भडगाव तालुक्यातील तांदुळवाडी गावासाठी अभिमानाचा क्षण ठरावा अशी घटना घडली असून, गावातील पाच तरुणांची विविध संरक्षण दलांमध्ये निवड झाली आहे. देशसेवेची संधी मिळाल्याने संपूर्ण गावात आनंद आणि उत्साहाचे वातावरण पसरले आहे.
निवड झालेल्या तरुणांमध्ये अनुज भैयासाहेब महाजन यांची Central Reserve Police Force (CRPF) मध्ये, नाना पवार यांची Central Industrial Security Force (CISF) मध्ये, तर अनुराग सुधीर पाटील आणि गौरव अनिल पाटील यांची Border Security Force (BSF) मध्ये निवड झाली आहे. तसेच अनंत तुकाराम मोरे यांची Indian Navy मध्ये निवड झाल्याने गावकऱ्यांचा अभिमान अधिकच वाढला आहे.
या यशानिमित्त गावातील ग्रामस्थांच्या वतीने निवड झालेल्या जवानांची भव्य मिरवणूक काढण्यात आली. मिरवणुकीदरम्यान “जय हिंद”च्या घोषणांनी संपूर्ण परिसर दणाणून गेला. या प्रसंगी अशोक परदेशी आणि प्रा. प्रशांत पाटील यांनी जवानांचा गुलाबपुष्प देऊन सत्कार केला.
या तरुणांनी कठोर मेहनत, शिस्त आणि देशप्रेमाच्या जोरावर हे यश मिळवले असून, त्यांची कामगिरी इतर युवकांसाठी प्रेरणादायी असल्याचे मत यावेळी उपस्थितांनी व्यक्त केले. मिरवणुकीत तरुणांसह महिला, ज्येष्ठ नागरिक मोठ्या संख्येने सहभागी झाले होते.
