भालोद ( sakshidar news ) :- डॉ. बाबासाहेब आंबेडकर स्टार्ट समितीचे सभासद असताना दिनांक २२ ऑक्टोबर १९२९ रोजी भालोद येथील न्यू इंग्लिश स्कूल ला भेट देऊन तसा शेरा लिहिलेला आहे . बाबासाहेबांनी लिहिलेला तो शेरा सदर संस्थेने जतन करून ठेवला आहे . बाबासाहेबांची ती भेट एक ऐतिहासिक तसेच शासकीय बाब असल्याने तो शेरा पुढील पिढीस नक्कीच प्रेरणा देत राहील असे विचार प्रसिध्द साहित्यिक व विचारवंत जयसिंग वाघ यांनी केले.बाबासाहेबांच्या भालोद भेटीचे औचित्य साधून वाघ यांनी त्यांच्या सहकाऱ्यांसह भालोद येथील न्यू इंग्लिश स्कूल ला भेट दिली , बाबासाहेबांच्या प्रतिमेला अभिवादन केले व सदर भेटी विषयीची माहिती दिली .
जयसिंग वाघ यांनी आपल्या भाषणात पुढं सांगितले की , बाबासाहेब मुंबई प्रांतातील अस्पृश्य व आदिवासी समाजाच्या सामाजिक , आर्थिक , शैक्षणिक विकासाचा अभ्यास करून त्यांच्या विकासार्थ ब्रिटिश सरकारला आवश्यक उपाय योजना सुचविण्या करिता स्टार्ट समितीच्या माध्यमातून या गावी आले होते . या भेटीत त्यांनी अस्पृश्य समाजातील मुलांना शिक्षण घेणे कसे अनिवार्य आहे या बाबत मार्गदर्शन केले आहे . शिक्षणाचा मूलमंत्र आपण प्रत्यक्षात आणून बाबासाहेबांचे स्वप्न साकार करावे असेही वाघ यांनी स्पष्ट केले.प्रसिध्द सामाजिक कार्यकर्ते प्रदीप सपकाळे यांनी सांगितले की बाबासाहेब एवढ्या ग्रामीण भागात येवून आपल्याशी संवाद साधत होते , मार्गदर्शन करीत होते या वरून बाबासाहेबांना आपल्या विषयी केवढी तळमळ होती हे दिसून येते . मुख्याध्यापक डी. व्ही. चौधरी यांनी सांगितले की पाच वर्षांनी बाबासाहेबांच्या या ऐतिहासिक भेटीस १०० वर्षे पूर्ण होतील तेंव्हा या संबंधाने मोठ्या कार्यक्रमाचे आयोजन केले जाईल . बाबासाहेबांचा हा शेरा आमच्या संस्थेस नेहमीच नवी ऊर्जा देत आला आहे .
कार्यक्रमाचे सूत्रसंचालन कुंदन तायडे यांनी तर आभारप्रदर्शन डी. एस. सुरवाडे यांनी केले . सामाजिक कार्यकर्ते समाधान सुरवाडे , व्यवस्थापक शांताराम भालेराव , पर्यवेक्षक आर. एस. जावळे , एस. एम. तायडे , पंकज वानखेडे आदींसह शिक्षकवृंद व विद्यार्थी मोठ्यासंख्येने हजर होते .
