Ramanandnagar police जळगाव (साक्षीदार न्यूज ) : – येथील पिंप्राळा परिसरातील विद्यानगरात बंद घर फोडून घरातून सोन्या-चांदीचे दागिने आणि रोख रक्कम असा ६० हजार रुपये किमतीचा ऐवज अज्ञात चोरट्यांनी चोरून नेल्याची घटना १३ जुलै रोजी सकाळी ८ वाजता समोर आली आहे. याप्रकरणी गुरुवारी, १८ जुलै रोजी रामानंदनगर पोलिसात गुन्हा दाखल केला आहे.
पिंप्राळा परिसरातील विद्यानगरात सपना अभिषेक जैन (रा.भोपाळ, मध्यप्रदेश) यांचे वडिल छगनलाल शांतीलाल सव्वालाखे यांचे घर आहे. काही दिवसांपासून त्यांच्या वडिलांचे घर बंद होते. त्यामुळे अज्ञात चोरट्यांनी त्याचा फायदा घेत बंद घराच्या दरवाजाचा कडीकोयंडा तोडून घरातून सोन्या-चांदीचे दागिने आणि रोख रक्कम असा ५९ हजार रुपये किमतीचा ऐवज चोरून नेला. ही घटना सपना जैन यांना समजली. त्यांनी जळगावात येवून घरात पाहणी केल्यावर घरात चोरी झाल्याचे समोर आले. त्यानंतर त्यांनी रामानंद नगर पोलिसात धाव घेवून तक्रार दिली. त्यानुसार रामानंदनगर पोलिसात अज्ञात चोरट्यांवर गुन्हा दाखल केला आहे. पुढील तपास पो.हे.कॉ. सुशील चौधरी करीत आहे.
