साक्षीदार | १७ नोव्हेबर २०२३ | जळगाव शहरातील पिंप्राळ्यातील मंगलमूर्ती नगरातून बंद घर फोडून अज्ञात चोरट्याने सोन्याचे, चांदीचे दागिने आणि रोकड असा एकूण १ लाख ३५ हजार ५०० रुपये किमतीचा मुद्देमाल चोरून नेल्याची घटना मंगळवार १४ नोव्हेंबर रोजी समोर आली. याप्रकरणी बुधवारी दुपारी ३ वाजता रामानंदनगर पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, शहरातील मंगलमूर्ती नगर येथील माजी सैनिक जगदीश काशिनाथ पाटील (वय ४३) हे दीपावलीच्या निमित्ताने १३ नोव्हेंबर रोजी ते परिवारासह घराला कुलूप लावून गावाला गेले होते. दरम्यान, चोरट्यांनी हीच संधी साधत बंद घर फोडून घरातून सोन्याचे व चांदीचे दागिने आणि रोकड असा एकूण १ लाख ३५ हजार ५०० रुपये किमतीचा मुद्देमाल चोरून नेला. हा प्रकार मंगळवार १४ नोव्हेंबर रोजी उघडकीला आला. त्यांनी घरात जाऊन पाहणी केली असता घरात सर्व सामान अस्ताव्यस्त पडलेले दिसून आले.
बुधवारी दुपारी ३ वाजता जगदीश पाटील यांनी रामानंदनगर पोलिस ठाण्यात धाव घेऊन तक्रार दिली आहे. त्यानुसार अज्ञात चोरट्यांविरोधात गुन्हा दाखल करण्यात आला आहे. पुढील तपास सहायक पोलिस निरीक्षक रोहिदास गभाले करीत आहेत.
