Yawal Police यावल | मिलिंद जंजाळे | शहरात कायदा व सुव्यवस्था राखण्यासाठी यावल पोलीस स्टेशनतर्फे दिनांक २३ मार्च रोजी रात्री उशिरापर्यंत विशेष काँबिंग ऑपरेशन राबविण्यात आले. या मोहिमेदरम्यान गुन्हेगार, बेकायदेशीर धंदे करणारे तसेच वाहतूक नियमांचे उल्लंघन करणाऱ्यांवर कडक कारवाई करण्यात आली.
या धडक कारवाईत विविध प्रकारचे गुन्हे उघडकीस आले. दारूबंदी अंतर्गत २ प्रकरणे, गांजा सेवनाचे १ प्रकरण तसेच ड्रंक अँड ड्राईव्हचा १ गुन्हा नोंदविण्यात आला. याशिवाय वाहतूक नियमांचे उल्लंघन करणाऱ्यांविरोधात ११ प्रकरणांमध्ये एकूण ₹७,४०० इतका दंड वसूल करण्यात आला.
तसेच नॉन-बेलेबल वॉरंट (NBW) अंतर्गत ३ आरोपींना ताब्यात घेण्यात आले, तर बेलेबल वॉरंट (BW) अंतर्गत ५ आरोपींवर कारवाई करण्यात आली. हिस्ट्रीशीटर असलेल्या ४ जणांची तपासणी करण्यात आली असून, त्यापैकी २ जण पोलिसांसमोर हजर झाले.
या विशेष मोहिमेमुळे गुन्हेगारी प्रवृत्तीवर आळा बसण्यास मदत होणार असून नागरिकांमध्ये सुरक्षिततेची भावना अधिक दृढ झाली आहे.
या कारवाईमुळे अवैध धंदे करणाऱ्यांमध्ये खळबळ उडाली असून, “कायदा सर्वांसाठी समान आहे” हा स्पष्ट संदेश पोलिसांनी दिला आहे.
पोलीस प्रशासनाने नागरिकांना आवाहन केले आहे की, गुन्हेगारी कृत्ये, नशेखोरी व वाहतूक नियमांचे उल्लंघन टाळावे. अशा प्रकारच्या कारवाया पुढेही सातत्याने सुरू राहणार असल्याचेही स्पष्ट करण्यात आले आहे.
