Cataract Surgery Camp यावल |मिलिंद जंजाळे | यावल-रावेर मतदारसंघात गरजू रुग्णांसाठी मोफत मोतीबिंदू शस्त्रक्रिया अभियान राबविण्यात येत असून, या उपक्रमामुळे विशेषतः ज्येष्ठ नागरिकांना मोठा दिलासा मिळणार आहे. आमदार अमोल हरिभाऊ जावळे यांच्या माध्यमातून हा उपक्रम हाती घेण्यात आला आहे.
डोळ्यांच्या आजाराने त्रस्त असलेल्या रुग्णांना योग्य उपचार मिळून त्यांना पुन्हा स्पष्ट दृष्टी मिळावी, या उद्देशाने हे अभियान राबवले जात आहे.
या अभियानांतर्गत सोमवार, २३ मार्च २०२६ रोजी सकाळी १० ते दुपारी २ या वेळेत ग्रामीण रुग्णालय, यावल येथे प्राथमिक तपासणी शिबिर आयोजित करण्यात आले आहे. या शिबिरात तपासणी करून पात्र ठरलेल्या रुग्णांची २६ मार्च २०२६ रोजी शासकीय वैद्यकीय महाविद्यालय व रुग्णालय (GMC), जळगाव येथे तज्ज्ञ डॉक्टरांकडून मोफत शस्त्रक्रिया केली जाणार आहे.
या उपक्रमामुळे मतदारसंघातील आर्थिकदृष्ट्या दुर्बल रुग्णांना मोठा फायदा होणार असून, अनेकांच्या आयुष्यात पुन्हा प्रकाश येणार आहे. जास्तीत जास्त नागरिकांनी या शिबिराचा लाभ घ्यावा, असे आवाहन आयोजकांकडून करण्यात आले आहे.
