Heart Attack यावल | मिलिंद जंजाळे | यावल शहरातील अंकलेश्वर–बऱ्हाणपूर राज्य मार्गावरील चोपडा नाक्याजवळ एका ३२ वर्षीय तरुणाचा धावत्या दुचाकीवर असताना हृदयविकाराच्या तीव्र झटक्याने मृत्यू झाल्याची दुर्दैवी घटना घडली आहे.
महेश संतोष येवले (वय ३२, रा. शिवाजीनगर, यावल) असे मृत तरुणाचे नाव आहे. मिळालेल्या माहितीनुसार, महेश येवले हे कोरपावली शेतशिवारातून काम आटोपून दुचाकीने शहराकडे येत होते. दरम्यान, जुना चोपडा नाक्याजवळ अचानक त्यांना हृदयविकाराचा तीव्र झटका आला आणि ते दुचाकीसह रस्त्यावर कोसळले.
ही घटना पाहताच परिसरातील काही मुस्लिम तरुणांनी तत्परता दाखवत जखमी अवस्थेतील महेश येवले यांना तातडीने यावल ग्रामीण रुग्णालयात दाखल केले. मात्र, वैद्यकीय अधिकारी डॉ. तुषार सोनवणे यांनी तपासणी करून त्यांना मृत घोषित केले.
ही घटना रविवारी दुपारी घडली असून, याबाबत पोलिसांत नोंद करण्यात आली आहे. या अचानक घडलेल्या घटनेमुळे परिसरात हळहळ व्यक्त होत आहे.
घटनेची माहिती मिळताच यावलच्या नगराध्यक्ष छायाताई पाटील, नगरसेवक अतुल पाटील, माजी उपनगराध्यक्ष मुकेश येवले, रोशन येवले, बापू जासूद आदींनी रुग्णालयात धाव घेत कुटुंबीयांचे सांत्वन केले.
