India OTT Ban | नवी दिल्ली | डिजिटल प्लॅटफॉर्म्सवरील सुरक्षितता आणि सभ्यता टिकवण्यासाठी केंद्र सरकारने मोठी कारवाई करत पाच OTT प्लॅटफॉर्म्सवर भारतात पूर्ण बंदी घातली आहे. ‘आयटी नियम 2021’ अंतर्गत असलेल्या अधिकारांचा वापर करून माहिती आणि प्रसारण मंत्रालय यांनी MoodXVIP, Koyal Playpro, Digi Movieplex, Feel आणि Jugnu या प्लॅटफॉर्म्सविरुद्ध कठोर निर्णय घेतला आहे.
सरकारच्या आदेशानुसार केवळ संबंधित वेबसाइट्स ब्लॉक करण्यात आलेल्या नाहीत, तर Google Play Store आणि Apple App Store वरूनही या अॅप्सना हटवण्याचे निर्देश देण्यात आले आहेत. त्यामुळे भारतीय युजर्सना ही अॅप्स डाउनलोड किंवा वापरता येणार नाहीत.
माहितीनुसार, या प्लॅटफॉर्म्सवरील आशय अश्लील व सामाजिक मूल्यांना धक्का देणारा असल्याच्या तक्रारी सरकारला प्राप्त झाल्या होत्या. विविध सामाजिक संघटना आणि पालकांकडून आलेल्या आक्षेपांनंतर संबंधित प्लॅटफॉर्म्सना स्पष्टीकरण देण्याची संधी देण्यात आली होती. मात्र समाधानकारक उत्तर न मिळाल्याने कायमस्वरूपी बंदीचा निर्णय घेण्यात आला.
सरकारच्या म्हणण्यानुसार, प्रेक्षकांना दर्जेदार आणि सुरक्षित कंटेंट उपलब्ध व्हावा हा या कारवाईमागील मुख्य उद्देश आहे. OTT क्षेत्रासाठी अधिक कडक नियमावली लागू करण्याची प्रक्रिया सध्या सुरू असून, ‘सेल्फ रेगुलेशन’ न पाळणाऱ्या इतर प्लॅटफॉर्म्सवरही भविष्यात कारवाई होण्याची शक्यता वर्तवली जात आहे.
दरम्यान, यापैकी कोणत्याही अॅपचे सबस्क्रिप्शन घेतलेल्या युजर्सची सेवा खंडित होऊ शकते. नागरिकांनी अनधिकृत व संशयास्पद प्लॅटफॉर्म्सपासून दूर राहावे, असे आवाहन सरकारकडून करण्यात आले आहे.
