Jalgaon Khandesh Festival |जळगाव | येथे स्थानिक महिला बचत गट आणि उद्योजकांना व्यासपीठ उपलब्ध करून देण्यासाठी २६ फेब्रुवारी ते २ मार्च दरम्यान सागर पार्क येथे ‘खान्देश महोत्सव २०२६’चे आयोजन करण्यात आले आहे. या महोत्सवाचे उद्घाटन पालकमंत्री गुलाबराव पाटील यांच्या हस्ते होणार आहे.
महोत्सवात एकूण १८० स्टॉल्स उभारण्यात येणार असून खान्देशी खाद्यपदार्थ, पारंपरिक हस्तकला वस्तू, घरगुती उत्पादनांना विशेष स्थान देण्यात आले आहे. स्थानिक बचत गटांनी तयार केलेल्या विविध वस्तूंना या माध्यमातून बाजारपेठ उपलब्ध होणार आहे.
याशिवाय महोत्सवादरम्यान विविध सांस्कृतिक कार्यक्रमांचे आयोजन करण्यात आले असून नागरिकांना कुटुंबासह आनंद घेण्याची संधी उपलब्ध होणार आहे.
महापौर दीपमाला काळे यांनी नागरिकांनी मोठ्या संख्येने उपस्थित राहून स्थानिक महिला बचत गटांना खरेदीद्वारे प्रोत्साहन द्यावे, असे आवाहन केले आहे. स्थानिक उद्योजकांना चालना देण्याच्या दृष्टीने हा महोत्सव महत्त्वाचा ठरणार असल्याचे त्यांनी नमूद केले.
