balgandharva sangeet mahotsav | साक्षीदार न्यूज | स्व. वसंतराव चांदोरकर स्मृती प्रतिष्ठानच्या वतीने आयोजित करण्यात येणारा २४ वा बालगंधर्व संगीत महोत्सव येत्या ९, १० व ११ जानेवारी २०२६ रोजी संगीतप्रेमींना मंत्रमुग्ध करणार आहे. शहरातील छत्रपती संभाजीराजे नाट्य मंदिर येथे दररोज सायंकाळी ७ ते ११ या वेळेत हा महोत्सव रंगणार आहे.
या प्रतिष्ठित महोत्सवाचे मुख्य प्रायोजक म्हणून Jain Irrigation Systems Ltd., भारत सरकारचे संस्कृती मंत्रालय तसेच रतनलाल सी बाफना ज्वेलर्स यांचे सहकार्य लाभले आहे. याशिवाय सुहान्स केमिकल्स प्रा. लि., दाल परिवार, वेगा केमिकल्स प्रा. लि., न्युबो टेक्नॉलॉजीस आणि चांदोरकर टेक्नॉलॉजीस प्रा. लि. यांचेही मोलाचे योगदान लाभत आहे.
महोत्सवाच्या पहिल्या दिवशी शास्त्रीय संगीताच्या दोन दर्जेदार सादरीकरणांनी रसिकांची मेजवानी होणार आहे.
🎶 गायन : श्रुती बुजरबरुआ
आसाममध्ये जन्मलेल्या आणि संगीतपरिवारात वाढलेल्या श्रुती बुजरबरुआ या भारतीय शास्त्रीय संगीतातील प्रतिभावान गायिका म्हणून ओळखल्या जातात. वयाच्या अवघ्या चौथ्या वर्षापासून त्यांनी पालकांकडून शास्त्रीय संगीताचे धडे घेण्यास सुरुवात केली. भातखंडे संगीत विद्यापीठ, लखनऊ येथून त्यांनी ‘संगीत विशारद’ व ‘संगीत अलंकार’ या पदव्या प्राप्त केल्या आहेत.
शुद्ध शास्त्रीय संगीतासोबतच ठुमरी, दादरा, अभंग, भजन, गझल अशा उपशास्त्रीय प्रकारांमध्येही त्या आपल्या सुमधुर आवाजाची मोहोर उमटवतात. बहुभाषिक असलेल्या श्रुती यांना त्यांच्या संगीतसाधनेबद्दल अनेक पुरस्कारांनी सन्मानित करण्यात आले आहे.
🎼 सतार वादन : चिराग कट्टी
तरुण पिढीतील आशादायी सतारवादक म्हणून चिराग कट्टी यांचे नाव आज शास्त्रीय संगीत क्षेत्रात आदराने घेतले जाते. पं. शशांक कट्टी यांच्याकडून संगीताचे शिक्षण घेतलेल्या चिराग हे आकाशवाणीचे ‘अ’ दर्जाचे कलाकार आहेत.
२०१७ आणि २०२४ या वर्षांत त्यांनी आकाशवाणीच्या प्रतिष्ठित ‘नॅशनल प्रोग्रॅम’मध्ये सतार वादन सादर केले आहे. ‘सुरमणी’ पुरस्काराचे मानकरी असलेले चिराग हे भारतीय सांस्कृतिक संबंध परिषदेच्या (ICCR) पॅनेलवरील कलाकार असून, भारत सरकारच्या सांस्कृतिक मंत्रालयाकडून त्यांना सतार वादनासाठी शिष्यवृत्तीही मिळाली आहे.
तीन दिवस चालणाऱ्या या बालगंधर्व संगीत महोत्सवात विविध नामवंत कलाकारांची सादरीकरणे होणार असून, जळगावातील संगीतप्रेमींना शास्त्रीय संगीतातील वैविध्यपूर्ण अनुभव घेण्याची संधी मिळणार आहे.
